నెట్ కనెక్షన్, కంప్యూటర్ లేకుండానే ఆండ్రాయిడ్ ఫోన్‌లో అప్లికేషన్‌లు ఇన్‌స్టాల్ చేయడానికి

  సాధారణంగా మన ఆండ్రాయిడ్ ఫోన్‌కి కావలసిన అప్లికేషన్‌లు గూగుల్  ప్లేస్టోర్‌లోకి వెళ్ళి ఇన్‌స్టాల్ చేసుకుంటాము. లేదా ఆ అప్లికేషన్ యొక్క .apk ఫైల్‌ని కంప్యూటర్‌లో డౌన్‌లోడ్ చేసుకొని ఫోనులోకి కాపీ చేసుకొని ఇన్‌స్టాల్ చేసుకొంటాము. దీనికి మన ఫోనుకు ఇంటర్‌నెట్ కనెక్షన్ లేదా ఇంటర్‌నెట్ కనెక్షన్ ఉన్న కంప్యూటర్ అయినా ఉండాలి. నెట్ కనెక్షన్, కంప్యూటర్ లేకుండానే ఆండ్రాయిడ్ ఫోన్‌లో అప్లికేషన్‌లు ఇన్‌స్టాల్ చేసుకోవడానికి మనకు కావలసిన అప్లికేషన్ లేదా గేమ్‌ ఇన్‌స్టాల్ చేయబడిఉన్న ఫోను మనకి అందుబాటులో ఉంటే చాలు. షేర్ ఆప్ అప్‌ని ఉపయోగించి ఒక ఫోన్‌ నుండి మరొక ఫోనుకి బ్లూటూత్ ద్వారా మనం ఫొటోలు మరియు వివిధ ఫైళ్ళను ఎలా అయితే పంపించుకుంటామో అలాగే అప్లికేషన్‌ల, గేమ్‌ల యొక్క .apk ఫైళ్లను కూడా పంపుకొని ఇన్‌స్టాల్ చేసుకోవచ్చు. అంతేకాకుండా ఈ షేర్‌ఆప్ అప్లికేషన్‌ని ఉపయోగించి యస్‌యమ్‌యస్(SMS) మరియు పేస్‌బుక్, గూగుల్ + వంటి వివిధ సామాజిక అనుసంధాన వేధికల ద్వారా వివిధ అప్లికేషన్‌ల యొక్క లంకెను పంచుకోవచ్చు, లేదా ఈమెయిల్‌లో అటాచ్‌మెంట్ వలే .apk ఫైళ్ళను పంపుకోవచ్చు మరియు అప్లికేషన్‌లని యస్‌డి కార్డులోకి బ్యాకప్ తీసుకోవచ్చు. ఈ ఆప్‌షేర్ ఆండ్రాయిడ్ ఆప్లికేషన్‌ని ప్లేస్టోర్ నుండి ఉచితంగాడౌన్‌లోడ్ చేసుకోవచ్చు. లేదా ఇక్కడ నుండి నేరుగా .apk ఫైల్‌ని డౌన్‌లోడ్ చేసుకోవచ్చు.

షేర్‌ఆప్‌ 
 
ఒకేసారి మనకు కావలసిన అప్లికేషన్‌లన్నిటిని షేర్ చేసుకోవచ్చు
 
షేర్‌ఆప్‌ని ఉపయోగించి వివిధ రకాలుగా అప్లికేషన్‌లని షేర్‌ చేసుకోవచ్చు

సయనోజెన్‌మోడ్ ఇన్‌స్టాలర్‌ గూగుల్ ప్లేస్టోర్ నుండి తొలగించబడింది

 ప్రముఖ మొబైల్ ఆపరేటింగ్ సిస్టం ఆండ్రాయిడ్ యొక్క ఒపెన్‌సోర్స్ రామ్‌ అయిన సయనోజెన్‌మోడ్ ఈ మధ్యే సులభంగా ఇన్‌స్టాల్ చేసుకోవడానికి అనువుగా ఇన్‌స్టాలర్‌ని విడుదల చేసిన సంగతి తెలిసినదే. అయితే అనుకున్నట్టుగానే గూగులోడు ప్లేస్టోర్ నుండి సయనోజెన్‌మోడ్ ఇన్‌స్టాలర్‌ని నిబంధనలను అతిక్రమించినందుకు అంటూ తొలగించాడు. సైనోజెన్‌మోడ్ ఎంతగా ప్రాచూర్యం పొందుతుందో ఇక్కడ ఇవ్వబడిన గణాంకాలను చూస్తే తెలుస్తుంది. ఇకనుండి ఎవరైన సైనోజెన్ మోడ్ ఇన్‌స్టాలర్ ని ఇన్‌స్టాల్ చేసుకోవాలంటే ఇక్కడ నుండి .apk ఫైల్‌ని డౌన్‌లోడ్ చేసుకొని ఇన్‌స్టాల్ చేసుకోవాలి. .apk ఫైల్‌ని ఆండ్రాయిడ్ ఫోన్‌లో ఎలా ఇన్‌స్టాల్ చేయాలో ఇక్కడ చూడవచ్చు.

సిపియు డబ్బాలో ఉండే భాగాలు

 కంప్యూటరు లో అతి ముఖ్యమైన భాగం సిపియుగా మనం పిలుచుకొనే రేకు డబ్బా. దీనిని కాబినెట్ అంటారు. ఇది రేకు డబ్బా అయినప్పటికీ దీనిలో మన కంప్యూటరు పనిచేయడానికి కావలసిన అన్ని పరికరాలు అమర్చబడి ఉంటాయి కనుక అది అతిముఖ్యమైనది, ఖరీధైనది. అందువలన దీని గురించి తెలుసుకోవడం తప్పనిసరి. మనం సిపియుని అప్పుడప్పుడు శుభ్రం చేయడానికి సిపియు డబ్బాకి ఒక వైపు ఉన్న రేకుని తొలగించినపుడు క్రింది చిత్రంలో వలే కనిపిస్తుంది. మొదటిసారి చూసేవారికి కొంత కొత్తగా అనిపించినప్పటికి ఒకటి రెండు సార్లు చూస్తే మనమే మన సిపియు డబ్బాని విప్పి శుభ్రం చేసుకోవచ్చు.

కంప్యూటరు సిపియు లోపలి బాగాలు

 మధర్ బోర్డ్:

మన సిపియు లో ఉన్న పెద్దబాగం మధర్ బోర్డ్ లేదా మెయిన్ బోర్డ్. కంప్యూటరులో ఉన్న అన్ని పరికరాలు (కొన్ని నేరుగా కొన్ని కేబుళ్ళ ద్వారా)దీనికి కలుపబడి ఉంటాయి.

యస్‌యమ్‌పియస్:

ఇది కంప్యూటరులోని అన్ని బాగాలకు కరెంటును సరఫరా చేస్తుంది. దీనిని నుండి వచ్చిన వివిధ రకాల కేబుళ్ళు వివిధ కంప్యూటరు భాగాలకు కలుపబడి ఉంటాయి.

హార్డ్‌డిస్క్:

మన సమాచారం ఫైళ్ళ రూపంలో దీనిలో బధ్రపరచబడి ఉంటుంది. దీనికి యస్‌యమ్‌పియస్ నుండి ఒక పవర్ కేబుల్ దీనినుండి మధర్ బోర్డుకు ఒక డాటా కేబుల్ కలుపబడి ఉంటాయి. మన కంప్యూటరులో మధర్ బోర్డులో ఉన్న పోర్టులను బట్టి మరిన్ని హార్డ్‌డిస్క్‌లు పెట్టుకోవడానికి కాబినెట్‌లో స్థలం ఉంటుంది.

సిపియు ఫ్యాన్:

మధర్‌బోర్డులో ప్రాససర్ పైన ఇది అమర్చబడి ఉంటుంది. ప్రాససర్ వేడెక్కకుండా చూడడం దీని పని. ఎక్కువగా దుమ్ము దీనికే పడుతుంది.

డివిడీడ్రైవ్:

డివిడీ/సీడీ లు చదవడానికి, వ్రాయడానికి ఉపయోగపడుతుంది. దీనికి యస్‌యమ్‌పియస్ నుండి ఒక పవర్ కేబుల్ దీనినుండి మధర్ బోర్డుకు ఒక డాటా కేబుల్ కలుపబడి ఉంటాయి. మన కంప్యూటరులో మధర్ బోర్డులో ఉన్న పోర్టులను బట్టి మరిన్ని డివీడీ డ్రైవ్‌లు పెట్టుకోవడానికి కాబినెట్‌లో స్థలం ఉంటుంది.


రామ్‌:

మధర్ బోర్డులో సాధారణంగా రెండు లేదా అంతకంటే ఎక్కువ రామ్‌ పెట్టుకోవడానికి కావలసిన స్లాటులు ఉంటాయి. ఎక్కువగా కంప్యూటర్ల సమస్యలు ఈ రామ్‌ వలన వస్తుంటాయి. చాలాసార్లు రామ్‌ తీసి వేరొక స్లాట్ లో పెట్టడం వలన కాని ఒకటి కంటే ఎక్కువ రామ్‌లు ఉన్నపుడు ఒకటి తీసివేయడం వలన సమస్య పరిష్కారం అవుతుంది.

మీ పిల్లల కోసం సరైన స్కూల్ ఎంచుకోవడానికి

 మానవుని అభివృధ్దిలో విద్యదే ఎంతో కీలక పాత్ర. పిల్లలకు బాల్యంలో ఉన్నపుడు మంచి విద్యను అందిస్తే వారిని తప్పకుండా మంచిపౌరులుగా తీర్చిదిద్దినట్లే. వారిని మంచి పౌరులుగా మలచడంలో ఉపాద్యాయులు పాత్ర తల్లిదండ్రులు కన్నా కొంచెం ఎక్కువే. అలాగే పాఠశాల వాతావరణం కూడా పిల్లల ఎదుగుదలపై చాలా ప్రభావం చూపింస్తుందనడం అతిశయోక్తికాదు. ఈ రోజుల్లో ఉన్న వేగవంతమైన జీవనంలో మన పిల్లలకు మంచి పాఠశాల వెతకడం కత్తి మీద సాము లాంటిదే. ఇప్పుడు చాలా వరకు జనాభా పట్టణాలకి వలస రావడం వలన ఇక్కడ పాఠశాలలకి డిమాండ్ ఎక్కువైంది. ప్రధాన నగరాలయిన హైదరాబాదు, డిల్లి, చెన్నై మరియు బెంగళూరు వంటి పెద్ద నగరాలలో ఉద్యోగాల నిమిత్తం తాత్కాలికంగా చాలా మంది నివాసాన్ని ఏర్పరుచుకుంటున్నారు. మనం కొత్తగా వెళ్ళబోతున్న చోట పాఠశాలల గురించి మనం ముందే తెలుసుకొని మనం అక్కడికి వెళ్ళే సరికి పిల్లల స్కూలు కూడా నిర్ణయించుకుంటే ఎంతబాగుంటుంది. 
 మనం వెళ్ళబోతున్న నగరం అక్కడ ఉన్న స్కూళ్ళు వాటిలో పీజులు వాటి గురించి ఇప్పటికే చదువుతున్న వారి తల్లిదండ్రుల అభిప్రాయాలు వంటివి ముందే తెలుసుకోగలిగితే మన పిల్లలకు కూడా మంచి స్కూల్ ని ఎంచుకోవచ్చుకదా. దానికోసం మనం ఎక్కడో తిరగనవసరం లేదు. ఇంట్లోనే ఉండి అందుబాటులో ఉన్న వివిధ స్కూళ్ళ గురించి తెలుసుకోవడానికి పేరెంట్రీ అన్న వెబ్ సైటు మనకి ఉపయోగపడుతుంది. పేరెంట్రీ అనేది వివిధ నగరాల్లో స్కూళ్ళ గురించి సమాచారాన్ని పంచుకోవడానికి ఓ మంచి వేధిక. ఇక్కడ ఫోరమ్‌ రూపంలో ఆయా స్కూళ్ళు, అడ్మిషన్ తేధి, పీజులు, అభిప్రాయాలు మరియు రవాణా వంటి పాఠశాలలకు సంబంధించిన విషయాలు మన లాంటివారు పంచుకుంటారు. అంతేకాకుండా ఇక్కడ తల్లిదండ్రులకు ఉపయోగపడు చాలా విషయాలు మనం చూడవచ్చు. 


ఆరోగ్యవంతమైన కంప్యూటర్‌కి ఐదు సూత్రాలు

 మన కంప్యూటరు మన జేబుకి చిల్లు పెట్టకుండా ఉండాలంటే మనం కంప్యూటర్‌పై గడిపే సమయంలో కొంత సమయం అప్పుడప్పుడు కేటాయిస్తే మన కంప్యూటర్ ఆరోగ్యకరంగా సమస్యలు లేకుండా ఉంటుంది. దాని ఫలితంగా మనం సమయాన్ని మరియు డబ్బుని ఆధా చేసుకోవచ్చు.  కంప్యూటర్ కి ప్రధాన శత్రువులు అయిన వాటిపై మనం జాగ్రత్తగా ఉంటే మన కంప్యూటర్ జీవితకాలాన్ని పెంచుకోవడమే కాకుండా తరచు చదివింపులనుండి తప్పించుకోవచ్చు. చాలా రోగాల విషయంలో చెప్పినట్టు చికిత్స కన్నా నివారణ మేలు అని కంప్యూటరు విషయంలో కూడా దీనిని వర్తించుకోవచ్చు. సమస్య వచ్చాకా దాన్ని బాగు చేసుకొనేకన్నా రాకముందే చిన్నచిన్న జాగ్రత్తలు తీసుకొంటే మన కంప్యూటరుని మంచి కండీషన్‌లో ఉంచుకోవచ్చు. క్రింద చెప్పిన ఐదు విషయాలు మనం పాటిస్తే కంప్యూటరు సమస్యల నుండి మనల్ని మనం కాపాడుకోవచ్చు.

శుభ్రంగా ఉంచుకోవడం: 

కంప్యూటరుకు దుమ్ము ప్రధాన శత్రువుల్లో ఒకటి దుమ్ము. ఇది మన కంప్యూటరులో చేరి పనితీరును దెబ్బతీయడమే కాకుండా కంప్యూటరు చల్లబరచడానికి గల ఫ్యాన్‌లపై చేరి మిగిలిన అన్ని బాగాలను వేడెక్కేటట్లు చేస్తుంది. మన కంప్యూటర్ ని అప్పుడప్పుడు శుభ్రపరుచుకుంటూ ఉండాలి లేదా కనీసం కంప్యూటరు నుండి శబ్ధం వచ్చినపుడు అయినా తప్పక శుభ్రంచేయాలి.

వేడెక్కకుండా ఉంచుకోవాలి:

కంప్యూటర్ సిపియు అన్నిటికన్నా ప్రధానమైనది అయినప్పటికి దానిని ఎక్కడో ఏదో ఒక మూలలో ఉంచడం మనం సాధారణంగా చూస్తుంటాము. సిపియుని సరిగా గాలి తగిలే, ఎండ తగలని, తడిలేని  స్థలంలో ఉంచుకోవాలి. సిపియు ఫ్యాన్‌లు అన్న వైపు అడ్డంకులు ఉంచగూడదు. కొన్ని రోజులకి ప్రాససర్ ఫ్యాన్ క్రింద ఉన్న పేస్ట్ ఆరిపోతుంది కనుక అప్పుడప్పుడు దాన్ని చూసి లేకపోతే కొత్త పేస్టు పెట్టుకోవాలి. అలాగే కంప్యూటరు శుభ్ర పరిచినప్పుడు ఎక్కువగా దుమ్ము ఉండే ప్రదేశంగా మనం సిపియు ఫ్యాన్ ని గుర్తించవచ్చు. అందువలన సిపియు ఫ్యాన్ని కూడా తప్పకుండా శుభ్రపరుచుకోవాలి.

కరెంటు :

కంప్యూటరుకు మరో ప్రధాన శత్రువు తరచు కరెంటు పోవడం. ఇది మన చేతుల్లో లేనప్పటికి యూపియస్ వాడడం ద్వారా మనం దీనిని అరికట్టవచ్చు. మనం కంప్యూటర్లో ఏదైనా ఏదైనా పనిచేస్తున్నప్పుడు కరెంటు పోవడం వలన ర్యామ్‌, హార్డ్ డిస్క్ వంటివి చెడిపోతుంటాయి. సాధారణంగా కంప్యూటర్లో ఏదైనా విడిభాగం చెడిపోతే అది కచ్చితంగా కరెంటు పోయినప్పుడూ కాని, కరెంటు వస్తూపోతూఉన్నపుడు ఓల్టేజి హెచ్చుతగ్గుల వలన కాని జరుగుతుంటుంది. అందువలన కరెంటు వస్తూపోతూ ఉన్నపుడు కంప్యూటరును ఆన్ చెయ్యకపోవడమే మంచిది. ఎర్తింగ్ కూడా తప్పకుండా ఉండేటట్లు చూసుకోవాలి. యూపియస్ తప్పకుండా వాడడం వలన కరెంటు ప్రమాదాలను చాలా వరకు అరికట్టవచ్చు. కంప్యూటరు అకస్మాత్తుగా మనం ఆపకుండా ఆగిపోవడాన్ని నివారిస్తే హార్డ్‌డిస్క్ బ్యాడ్ సెక్టార్లు రావడం, ఆపరేటింగ్ సిస్టం కరెప్టెడ్, ఫైల్ మిస్సింగ్ వంటి సమస్యలు రాకుండా ఉంటాయి.

వైరస్:

తరచు కంప్యూటర్లు బాగుచేయించడానికి వచ్చే వాటిలో ఎక్కువ గా వైరస్ సమస్యలతో వస్తుంటాయి. మొత్తంగా వాటిని వైరస్‌లు అని మనం పిలుచుకున్నప్పటికి వాటిలో మాల్‌వేర్లు, ట్రోజాన్, స్పైవేర్లు అని చాలా‌రకాలు సిస్టంకి హాని కలిగించే సాఫ్ట్‌వేర్లు ఉన్నాయి. ఈ వైరస్‌ల వలన ఆపరేటింగ్ సిస్టం చెడిపోవడంకాని సిస్టం నెమ్మదిగా పనిచేయడం గాని జరుగుతుంది. వైరస్ అన్నది మన కంప్యూటరికి నెట్ నుండి గాని పెన్‌డ్రైన్ వలన గాని వస్తుంది. కనుక ఒక మంచి యాంటీవైరస్ సాఫ్ట్‌వేర్‌ని ఇన్‌స్టాల్ చేసుకొని తరచు దానితో మన సిస్టంని స్కాన్ చేసుకోవాలి. అన్నట్టు యాంటీ వైరస్ ని ఎల్లపుడు అప్‌డేట్‌గా ఉంచుకోవాలి ఎందుకంటే యాంటీవైరస్‌కి వైరస్‌లను గుర్తుపట్టి వాటిని నిర్వీర్యం చేసే శక్తి అప్‌డేట్ల ద్వారానే అందుతుంది. సిస్టంకి పెన్‌డ్రైవ్ తగిలించినపుడు ముందుగా దాన్ని యాంటీవైరస్‌తో స్కాన్ చేసిన తరువాతనే తెరవాలి. అంతేకాకుండా అడ్డమైన సైట్స్‌ని తెరవకుండా ఉండడం కూడా నెట్ నుండి వైరస్‌లు రాకుండా ఉండడానికి చక్కని పరిష్కారం.

అప్‌డేట్:

ఆపరేటింగ్ సిస్టం లో ఉన్న బధ్రతా పరమైన లోపాలను సవరించడానికి తయారీదారు సమస్యని గుర్తించినపుడు ఆసమస్యకి సంబంధించిన పరిష్కారాన్ని అప్‌డేట్స్‌ రూపంలో విడుదల చేస్తుంటారు. కనుక మనం వాడే ఆపరేటింగ్ సిస్టం,డ్రైవర్ల  మరియు సాఫ్ట్‌వేర్ల అప్‌డేట్స్ ని తప్పకుండా ఇన్‌స్టాల్ చేసుకోవాలి. మనం చేయవలసిందల్లా అప్‌డేట్స్ అందుబాటులో ఉన్నాయి ఇన్‌స్టాల్ చెయ్యాలా అని అడిగినప్పుడు ఒకే అని నొక్కడమే.

వేరే వాళ్ళ కంప్యూటర్లో వెబ్ బ్రౌజింగ్ చేస్తుంటే ఇది మీకు తప్పక ఉపయోగపడుతుంది

 మనం వెబ్ బ్రౌజింగ్ చేసేటప్పుడు మనం చూసిన వెబ్ పేజిలు, మరియు వివిధ సైట్లలో మన సెట్టింగులు వంటి సమాచారం కంప్యూటర్లో దాయబడుతుంది. ముఖ్యంగా మనం వేరే వాళ్ళ కంప్యూటర్లు లేదా ఇంటర్‌నెట్ సెంటర్‌లో మనం వెబ్ బ్రౌజింగ్ చేసిన తరువాత ఎవరైనా మన బ్రౌజింగ్ చరిత్రని సులభంగా తెలుసుకోవచ్చు. మనం వేరేవాళ్ళ కంప్యూటర్లో నెట్ వాడవలసినపుడు ఈ చిన్న చిట్కా అనుసరిస్తే మన బ్రౌజింగ్ సమాచారాన్ని ఇతరులు చూడకుండా చేయవచ్చు. మనం తాత్కాలికంగా వాడబోతున్న కంప్యూటర్లో ఫైర్‌ఫాక్స్ వెబ్ బ్రౌజర్ని ప్రైవేట్ బ్రౌజింగ్ మోడ్‌లో ఒపెన్ చేసి వెబ్ బ్రౌజింగ్ చేస్తే మనం చూసిన వెబ్ సైట్ల తాలుకు సమాచారం ఏది కంప్యూటర్లో సేవ్ చెయ్యబడదు. క్రింది చిత్రంలో చూపించినట్లు లేదా ఫైర్‌ఫాక్స్ ఐకాన్‌ని రైట్ క్లిక్ చేసి ఈ ప్రైవేట్ బ్రౌజింగ్ మోడ్ లోకి వెళ్ళవచ్చు. ఈ ప్రైవేట్ బ్రౌజింగ్ మోడ్ కూడా మనం మామూలుగా వాడే ఫైర్‌ఫాక్స్ లాగే ఉంటు అన్ని ఫైర్‌ఫాక్స్ ఫీచర్లు పనిచేస్తాయి. రెండిటికి తేడా కేవలం ఎటువంటి బ్రౌజింగ్ డాటాని కంప్యూటర్లో సేవ్ చెయ్యకపోవడమే. అందువలన బయటి సిస్టంలు అనగా ఇంటర్ నెట్ సెంటర్లు మరియు కార్యాలయాలు వంటి చోట మన సమాచారం సురక్షితంగా ఉంచుకోవడానికి ఈ ప్రైవేట్ బ్రౌజింగ్ ని వాడుకోవచ్చు.

ఫైర్‌ఫాక్స్ లో పైవేట్ బ్రౌజింగ్ మోడ్‌ని తెరవడం
 
ఫైర్‌ఫాక్స్ ప్రైవేట్ బ్రౌజింగ్ మోడ్ విండో

కంప్యూటర్ ఉంటే ఇవి తప్పనిసరి

 ఈ రోజుల్లో కంప్యూటర్ లేని వారు చాలా అరుదు. చాలా వరకు అందరి ఇళ్ళలో, చిన్న పెద్దా దుకాణాలలో, పాఠశాలలలో ఇలా అన్ని చోట్లా కంప్యూటరు పాగా వేసింది. ఇంత ప్రాచుర్యం పొందినప్పటికి ఇప్పటికి చాలా మంది కంప్యూటరు తో ఉండవలసిన అత్యవసర సామాగ్రి మాత్రం కలిగి ఉండడం లేదు. ఈ సామాగ్రి ఉంటే మనమే చాలా వరకు సమస్యలను అధిగమించవచ్చు లేదా సమస్య ఏమిటో తెలుసుకొని అదనపు వ్యయాన్ని అరికట్టవచ్చు. ఆ సామాగ్రి కూడా పెద్ద ఖరీదైనవేం కాదు. మనం ఒకసారి చదివించుకున్న డబ్బులతో వీటిని కొనుక్కోవచ్చు. చాలా రోజులు పాటు వాడుకోవచ్చు.

 దుమ్ము దులపడానికి:

కంప్యూటరు లో వచ్చే చాలా సమస్యలకి పరిష్కారం దుమ్ము దులపడం. కంప్యూటరులో ఉండే పరికరాలు చాలా సున్నితమైనవి కనుక మనం ఈ పని చాలా జాగ్రత్తగా చేయాలి. బట్టతో తుడవడం వంటివి చేయగూడదు. మనం ఈ పనికి బ్లోయర్ కాని మెత్తని రంగులేసే బ్రష్‌ని కాని ఉపయోగించవచ్చు. ఎటువంటి ఖర్చు లేకుండా రంగులేసే బ్రష్‌తో సున్నితంగా దుమ్ముని తొలగించుకోవచ్చు.

బ్లోయర్


రంగులేసే బ్రష్

స్క్రూడ్రైవర్:

మనం సాధారణంగా‌ వాడే స్క్రూడ్రైవర్ కాకుండా నక్షత్రాకార స్క్రూడ్రైవర్ కంప్యూటర్ లో చాలా భాగాలను విప్పడానికి పనికొస్తుంది. కనీసం మనం శుభ్రం చేసుకోవాడానికి డబ్బాని విప్పడానికి ఒక స్టార్ స్క్రూడ్రైవర్ ఉండాలి. లేదా మూడొందలు మనవి కావనుకుంటే వివిధ రకాల పరిమాణాలున్న స్క్రూడ్రైవర్ సెట్ వస్తుంది. 

స్టార్ స్క్రూడ్రైవర్

కంప్యూటర్ బాగుచేయడానికి ఉపయోగపడే వేరువేరు పరిమాణాలున్న స్క్రూడ్రైవర్ సెట్టు

యాంటీస్టాటిక్ రిస్ట్ బేండ్:

 మన కంప్యూటరులో ఉండే విడిభాగాలు అన్ని చిన్న చిన్న సున్నితమైన ఎలక్ట్రానిక్ సర్క్యూట్ లను కలిగి ఉంటాయి. అవి చాలా తక్కువ ఓల్టేజితో పనిచేస్తాయి. మన కదలికల ద్వారా ఉత్పత్తి అయిన స్టాటిక్ ఎలెక్ట్రసిటి ఓల్టేజి వలన కూడా అవి పాడయిపోయే ప్రమాదం ఉంది కనుక స్టాటిక్ ఎలెక్ట్రసిటి ని డిస్చార్జి చేయడానికి యాంటీస్టాటిక్ రిస్ట్ బేండ్ ధరించాలి.

కంప్యూటరుని బాగు చేస్తున్నపుడు యాంటీస్టాటిక్ రిస్ట్ బేండ్ తప్పనిసరి

హీట్ సింక్ కాంపౌండ్:

మనం కంప్యూటరు వాడుతున్నపుడు ఎక్కునగా పనిచేసే భాగం, మరియు వేడిని ఉత్పత్తి చేసే బాగం ప్రాససర్. దీనికి ప్రత్యేకంగా ఒక ఫ్యాన్ ఉండి దీనిని చల్లబరుస్తు ఉంటుంది. ఆ ఫ్యానుకి ప్రాససర్‌కి మధ్య పేస్టులాంటిది ఉంటుంది. ఇది కొన్నిరోజులకి అయిపోతుంది. అలాంటప్పుడు ప్రాససర్ వేడెక్కి కంప్యూటర్ ఆగిపోతుంది. అందువలన కంప్యూటర్ శుభ్రపరిచినప్పుడల్లా కాకుండా కనీసం సంవత్సరానికొకసారి అయినా ఈ హీట్ సింక్ పేస్టుని పెట్టుకోవాలి. ఇది మనకి చిన్న డబ్బా, ట్యూబు, చిన్న పాకెట్, సిరంజిలో లభిస్తుంది.

హీట్‌సింక్ కాంపౌండ్

డయాగ్నసిస్ టూల్:

మన కంప్యూటర్లో ఉన్న వివిధ పరికరాలలో సమస్య ఎక్కడ ఉందో తెలుసుకోవడానికి ఈ అధ్బుతమైన టూల్ ఉపయోగపడుతుంది. అల్టిమేట్ బూట్ సిడి అను ఈ టూల్ ని ఉపయోగించి హార్డ్ డిస్క్ డయాగ్నసిస్, రామ్‌ మరియు ప్రాససర్ ఇలా అన్ని పరికరాలను పరిక్షించవచ్చు.

అల్టిమేట్ బూట్ సిడి

ఆపరేటింగ్ సిస్టం :

మనం కంప్యూటర్ కొన్నప్పుడు వచ్చే ఆపరేటింగ్ సిస్టం సిడి లేదా మన సిస్టం యొక్క రికవరీ డిస్క్ తప్పనిసరిగా ఉండాలి. ఒకవేళ ఆ సిడి లేదా డీవీడీ మీ దగ్గర లేకపోతే ఉచితంగా దొరికే ఆపరేటింగ్ సిస్టం సిడి ఇమేజిని ఇక్కడ నుండి దింపుకోని సీడీలలో వ్రాసుకోవచ్చు. అవసరమయినప్పుడు ఇన్‌స్టాల్ చేసుకోవచ్చు లేదా సీడీ నుండే లైవ్‌గా వాడుకోవచ్చు. ఈ లైవ్ సీడీని ఉపయోగించి సులభంగా పాడయిపోయిన సిస్టం నుండి డాటాని రికవరీ చెయ్యవచ్చు. ఈ లినక్స్ ఉచిత ఆపరేటింగ్ సిస్టం లను పెన్‌డ్రైవ్ నుండి కూడా ఇక్కడ చెప్పినట్లు తయారుచేసుకొని వాడుకోవచ్చు.

డెబియన్ సిడి
పెన్‌డ్రైవ్ లో ఉబుంటు

డ్రైవర్లకి పరిష్కారం:

 విండోస్ వాడేవారు తప్పక ఉంచుకోవలసిన సిడీ డ్రైవర్ పేక్ సొల్యూషన్ డివీడి. విండోస్ ఇన్‌స్టాల్ చేసిన తరువాత డైవర్ల గురించి వెతకనవసరం దీని ద్వారా మనం తప్పించుకోవచ్చు. దీని గురించి మరింత సమాచారం ఇక్కడ చూడవచ్చు.

తరచు కంప్యూటరు కొట్టు వాడికి డబ్బులు చదివించుకొని విసిగిపోయారా?

 మనం సాధారణంగా కంప్యూటర్ ఆన్ చేసి డెస్క్‌టాప్ రాగానే మన పనులు చేసుకొని పని అయిపోగానే తిరిగి కంప్యూటరును ఆపివేస్తాము. ప్రతిరోజు బాగానే ఆన్ అయినప్పటికి ఒకొక్కసారి కంప్యూటర్ ఆన్ కాకుండా సతాయిస్తు ఉంటుంది. దానితో మనం కంప్యూటరును దగ్గరలో ఉన్న కంప్యూటరు బాగుచేసే వాడి దగ్గరకు తీసుకొని వెళ్ళడం లేదా వాడినే ఇంటికి పిలిపించి బాగు చేయిస్తాము. సాధారణంగా కంప్యూటర్లు బాగుచేసే వాళ్ళు మన ముందు బాగు చేయడానికి ఇష్టపడరు. తరువాత రమ్మని చెప్పి పంపించి వేస్తుంటారు. సమస్య ఏదైనప్పటికి సాధారణంగా ఫార్మాటు చెయ్యాలి అని, చేసి తొందరగా మనకి డెస్క్‌టాప్ చూపించి డబ్బులు తీసుకుంటూ ఉంటారు. లేదా అది పోయింది ఇది పోయిందని చెప్పి నిలువు దోపిడి చేస్తుంటారు. సాధారణంగా కంప్యూటరు బాగు చేయడానికి వచ్చే వాటిలో చాలా కంప్యూటర్లు చిన్న చిన్న సమస్యల కారణంగా వస్తుంటాయి. వాటిని మనం ఇంటి దగ్గరే మనమే పరిష్కరించుకోవచ్చు. మన తెలియని తనాన్ని వాడు సొమ్ము చేసుకుంటాడు. మనం కొంత ఆశక్తి చూపిస్తే అది గొప్ప విద్యేంకాదు. 
 వదులుగా ఉన్న కనెక్షన్‌ల వలన, సిపియు డబ్బాలో దుమ్ముచేరడం, ప్రాససర్ వేడెక్కడం, రామ్‌ సరిగా పెట్టకపోవడం, కరెంటు ఓల్టేజిలో హెచ్చుతగ్గులవల్ల, వైరస్ వలన సిస్టం పనితీరు మందగించడం, తరచు రీస్టార్ట్ అవడం, మనం పనిచేస్తున్నపుడు తరచు కరెంటు పోవడం వలన రామ్‌ పోవడం, హార్డ్‌డిస్క్ బ్యాడ్ సెక్టార్‌లు ఏర్పడడం వంటి సాధారణ సమస్యలు. అసలు సమస్య ఏమిటో తెలుసు కుంటే మనం సగం దోపిడినీ అడ్డుకున్నట్టే. నిజంగా ఏదైనా విడి బాగం పోతే సమస్య తెలిస్తే మనమే ఆ విడిబాగాన్ని నాణ్యమైన దానితో మార్చుకోవచ్చు. అదే కంప్యూటరు బాగు చేసేవాళ్ళయితే తక్కువ రకం  వాటిని అమర్చి ఎక్కువ డబ్బు తీసుకోవచ్చు. అందువలన మనకి సంబంధం లేని విషయం అయినప్పటికి తెలుసుకొని ఉంటే అత్యవసర సమయాల్లో చేతిచమురు వదలకుండా ఉండడమే కాకుండా ఇతరులకి కూడా సహాయం చేయవచ్చు. అంతేకాకుండా కొంత తెలిసినవాళ్ళ దగ్గర కంప్యూటరు కొట్టువాడు కూడా జాగ్రత్తగానే ఉంటాడు.  



 ఇలా కంప్యూటర్లలో తరచు వచ్చే సమస్యలు వాటికి పరిష్కారాలు మనం తరువాతి టపాలలో చూద్దాం.

ఫైర్‌ఫాక్స్ కొత్త రూపం

విండోస్,మాక్ మరియు ఉబుంటు లో ఫైర్‌ఫాక్స్ కొత్తరూపం ఆస్ట్రాలిస్

 సాధారణంగా ఫైర్‌ఫాక్స్ వాడుతున్నవారు వెర్షన్‌కి వెర్షన్‌కి రూపంలో పెద్దగా మార్పులు లేకపోవడం గమనించే ఉంటారు. నిజానికి ఫైర్‌ఫాక్స్ కొంత వెనకబడడానికి ఇది కూడా కొంత కారణం కావచ్చు. దానిని అధికమించడానికి తొదరలో మొజిల్లా ఫౌండేషన్ వారు కొత్త రూపంతో ఫైర్‌ఫాక్స్‌ని విడుదలచేయబోతున్నారు. ఈ కొత్త రూపం ఇప్పుడు ఎక్కువగా వాడుతున్న తాకేతెరలకు అనుగుణంగా ఆధునికంగా ఉండడమే కాకుండా ఆకర్షణీయంగాను ఉండబోతుంది. అభివృద్ది దశలో ఉన్న ఈ ఫైర్‌ఫాక్స్ కొత్త రూపాన్ని అస్ట్రాలిస్ గా వ్యవహరిస్తున్నారు. కొత్త రూపంతో ఉన్న ఫైర్‌ఫాక్స్ ని ఇప్పుడే ఇక్కడ నుండి దింపుకొని ప్రయత్నించవచ్చు. అస్ట్రాలిస్ యొక్క ఫీచర్లను రూపాన్ని క్రింది వీడియోలో చూడవచ్చు.

క్రెడిట్ కార్డు అంత చిన్న కంప్యూటర్

 కంప్యూటర్ వచ్చిన తొలిరోజులలో పెద్ద గది అంత ఉండేది. శాస్త్రవేత్తల కృషి ఫలితంగా క్రమంగా రూపు మార్చుకొంటూ చిన్నదవుతూ వచ్చింది. డెస్క్‌టాప్, లాప్‌టాప్ చివరకి అరచేతిలో పట్టే మొబైల్ ఫోన్ ఇలా చిన్నది తయారయింది. ఇప్పుడు మరింత చిన్నదిగా అంటే మనం వాడే క్రెడిట్/ఏటియం కార్డు పరిమాణంలో మారిపోయింది. అలా క్రెడిట్ కార్డు అంత ఉన్న కంప్యూటర్ పేరే రాస్ప్‌బెర్రి పై. 
యస్‌డి కార్డు ప్రక్కన రాస్ప్‌బెర్రి పై
 రాస్ప్‌బెర్రి పై ని కంప్యూటర్ సైన్స్ మూలాల గురించి తక్కువ ఖరీదులో పాఠశాలలలో బోధించడాన్ని ప్రోత్సహించడానికి ఇంగ్లాండు లో ఉన్న రాస్ప్‌బెర్రి పై ఫౌండేషన్ వారు తయారుచేసారు. దీనిని వాణిజ్య పరంగా తయారుచేసి అమ్మడానికి న్యూఆర్క్ ఎలిమెంట్ 14, ఆర్‌యస్ కాంపోనెంట్స్ మరియు ఇగొమెన్ అన్న సంస్థలకి అనుమతి గలదు. రాస్ప్‌బెర్రి పై లో రెండు రకాలు ఉన్నాయి. ఒకటి 25 డాలర్లు, ఇంకొకటి 35 డాలర్లు. ఆ సంస్థలు రాస్ప్‌బెర్రి పై ని తయారుచేసి ఆన్‌లైన్‌లో అమ్మకాలు కొనసాగిస్తారు.
 రాస్ప్‌బెర్రి పై లో క్రెడిట్ కార్డు పరిమాణం ఉన్న బోర్డులో కంప్యూటరుగా పనిచేయడానికి కావలసిన అన్ని పరికరాలు అమర్చినారు. దీనిలో 700 మెగా హెర్ట్‌జ్ ప్రాససర్, 250 మెగా హెర్ట్‌జ్ జిపియు, 256 లేదా 512 యంబి రామ్‌, ఒకటి లేదా రెండు యుయస్‌బి పోర్టులు, ఇథర్‌నెట్ పోర్టు, హెచ్‌డియమ్‌ఐ పోర్టు, 3.5 యమ్‌యమ్‌ జాక్, పవర్ కోసం ఒక మైక్రో యుయస్‌బి పోర్టు మరియు యస్‌డి కార్డు స్లాటు ఉన్న ఈ కంప్యూటరు 45 గ్రాములు ఉంటుంది. 
రాస్ప్‌బెర్రి పై మోడల్ బి నమూనా చిత్రం
 
  రాస్ప్‌బెర్రి పై లో ఇన్‌స్టాల్ చేసుకోవడానికి రాస్ప్‌బియన్ అను డెబియన్ ఆధారిత ఆపరేటింగ్ సిస్టమ్‌ను ఉచితంగా అందిస్తున్నారు. రాస్ప్‌బియన్ కాకుండా ఈ చిన్ని కంప్యూటర్లో ఇన్‌స్టాల్ చేసుకోవడానికి వివిధ ఆపరేటింగ్ సిస్టంలు అందుబాటులో ఉన్నాయి. వాటికి ఇక్కడ నుండి ఉచితంగా డౌన్‌లోడ్ చేసుకోవచ్చు. దీనిలో మనం ఆపరేటింగ్ సిస్టమును యస్‌డి కార్డులో ఇన్‌స్టాల్ చేసుకోవాలి.

మానీటర్/టీవీలకి ఉండే పోర్టులు వాటి కేబుళ్ళు

 ఇప్పుడు వస్తున్న టీవీలు, మానీటర్లు వివిధ పరికరాలు అనుసంధానించడానికి వివిధ రకాల పోర్టులతో వస్తున్నాయి. అవి ఎలా ఉంటాయి వాటి వలన ఉపయోగాలు చూద్దాం.

హెచ్‌డియమ్‌ఐ పోర్ట్:

హెచ్‌డియమ్‌ఐ అంటే హై డెపినేషన్ మల్టిమీడియా ఇంటర్‌ఫేజ్. ఇప్పుడు వస్తున్న టీవీ, మానీటర్, కంప్యూటర్, లాప్‌టాప్, సెటాప్ బాక్స్, డీవిడీ ప్లేయర్, గేమింగ్ బాక్సులు ప్రొజెక్టర్లు మరియు మొబైళ్ళు, టాబ్లెట్లు, కెమేరాలు (మిని లేదా మైక్రో హెచ్‌డియమ్‌ఐ) అన్ని హెచ్‌డియమ్‌ఐ పోర్టులతో వస్తున్నాయి. ఇప్పటి వరకు వచ్చిన పరిజ్ఞానంలో ఇదే అత్యంత నాణ్యత కలిగినది. దీనిని ఉపయోగించి అధిక నాణ్యతతో కూడిన సినిమాలు నాటి నాణ్యత తగ్గకుండా వేరే పరికరాల నుండి టీవీ మరియు మానీటర్లలో చూడవచ్చు. మానీటర్లలో ఒకటి లేదా రెండు టీవీలలో ఒకటి నుండి నాలుగైదు హెచ్‌డియమ్‌ఐ పోర్టులు ఇప్పుడు మనకి అందుబాటులో ఉన్నాయి. వాటి ద్వారా మనం కంప్యూటర్, లాప్‌టాప్, సెటాప్ బాక్స్, డీవిడీ ప్లేయర్, కెమేరా, ఫోను మరియు టాబ్లెట్లను నేరుగా టీవీ/మానీటర్లకి కనెక్ట్ చేసుకోవచ్చు.

హెచ్‌డియమ్‌ఐ కేబుల్

హెచ్‌డియమ్‌ఐ పోర్టు
వివిధ రకాల హెచ్‌డియమ్‌ఐ పోర్టులు
 మైక్రో లేదా మిని హెచ్‌డియమ్‌ఐ ఉన్న డివైస్లను టీవీలతో కలపడానికి ఒక ప్రక్క మామూలు హెచ్‌డియమ్‌ఐ మరొక ప్రక్క  మైక్రో లేదా మిని హెచ్‌డియమ్‌ఐ ఉన్న కేబుళ్ళు కూడా మనకు దొరుకుతున్నాయి. చాలా కంపెనీలు మనం డివైస్ కొన్న పుడు వాటితో టీవీకి కనెక్ట్ చేసుకోవడానికి తప్పనిసరిగా హెచ్‌డియమ్‌ఐ కేబుల్‌ని కూడా ఇస్తున్నాయి.

డివీఐ పోర్టు:

డివీఐ అంటే డిజిటల్ విజువల్ ఇంటర్‌ఫేజ్. ఇది హెచ్‌డియమ్‌ఐ కి ముందు వచ్చిన పరిజ్ఞానం. ఇది దాని ముందు వచ్చిన విజిఎ తో కంపెటబుల్ గా ఉంటునే దానిని మించిన నాణ్యత నివ్వడం దీని ప్రత్యేకత. ఇది కూడా వివిధ పరికరాలను మానీటర్ లేదా టీవీ లకు అనుసందానించడానికి ఉపయోగపడుతుంది. గేమింగ్ బాక్సులు, కంప్యూటర్లు, మానీటర్లు, లాప్‌టాప్‌లలో విరివిగా కనిపించే ఈ పోర్టు టీవీ, డివీడి ప్లేయర్లలో  తక్కువగా కనిపిస్తుంటుంది. 


డివీఐ పోర్ట్

డివీఐ కేబుల్

విజిఎ పోర్టు:

విజిఎ అంటే విడియో గ్రాఫిక్స్ యరే. ఇది హెచ్‌డియమ్‌ఐ,డివీఐ కన్నా ముందు వచ్చిన ఎక్కువగా వాడిన వాడబడుతున్న పరిజ్ఞానం. ఇది ఇంచుమించు అన్ని కంప్యూటర్లు, లాప్‌టాప్‌లు,మానీటర్లు మరియు ఇప్పుడు వస్తున్న టీవీలలో చూడవచ్చు. దీనిని కంప్యూటర్ సిపియుని లేదా లాప్‌టాప్‌ని మానీటర్ లేదా టీవీకి అనుసందానించడానికి ఉపయోగిస్తాము. నిన్నటి తరం టీవీ ట్యునర్ లలో కూడా ఇది ఎక్కువగా కనిపిస్తుంది.

విజిఎ పోర్టు

విజిఎ కేబుల్

యుయస్‌బి పోర్ట్:

యుయస్‌బి అంటే యూనివర్సల్ సిరియల్ బస్. ఇది కంప్యూటర్ వాడేవారికి తప్పకుండా తెలుస్తుంది. కంప్యూటర్ల వాడకం గతిని మార్చిన పోర్టు ఇది. ఇంచుమించు అన్ని పరికరాలకి తప్పకుండా ఉంటుంది. ఫోన్‌లు వంటి చిన్న పరికరాలకి కూడా మైక్రో యుయస్‌బి రూపంలో ఉందుబాటులో ఉంటుంది. ఇక టీవీల విషయాని కొస్తే ఒకటి నుండి నాలుగు పోర్టుల వరకు ఉంటున్నాయి. దీనిని ఉపయోగించి పెన్‌డ్రైవ్ లేదా ఎక్స్‌టర్‌నల్ హార్డ్‌డిస్కులను టీవీకి అనుసంధానించి ఫోటోలు,పాటలు మరియు సినిమాలు చూడడానికి నెట్ లేదా కెమేరా వంటివి టీవీకి అనుసందానించడానికి ఉపయోగపడుతుంది. ఇప్పుడు వస్తున్న డీవీడీ ప్లేయర్లు,సెటాప్ బాక్సులకి కూడా యుయస్‌బి పోర్టులు ఉంటున్నాయి.

యుయస్‌బి కేబుల్ మరియు యుయస్‌బి పోర్ట్

ఆర్‌యఫ్ కనెక్టర్:

ఈ ఆర్‌యఫ్(రేడియో ఫ్రీక్వెన్‌సి) కనెక్టర్ మన టీవీకి యాంటెన్నా వైరు, కేబుల్ టీవీ వైరు, సెటాప్ బాక్సు, వీసిపి మరియు వీసిఆర్ లను కలపడానికి వాడుతుంటాము. ఇది పాత టీవీలు మొదలుకుని ఇప్పుడు వచ్చే ఆధునికమైన టీవీలలో మనం చూడవచ్చును. ఈ మధ్య దీనిని అంతగా వాడడంలేదు.

యాంటెన్నా వైరుని టీవీకి కలిపే ఆర్‌యఫ్ కనెక్టర్

స్టీరియో/కాంపోజిట్ వీడియో:

దీన్ని మనం సాధారణంగా సెటాప్ బాక్స్ లేదా డివీడి ప్లేయర్‌లను టీవీకి కలపడానికి వాడతాము. బాగా పాత టీవీలకు తప్పించి మిగిలిన అన్ని టీవీ లకు ఈ పోర్టులు అందుబాటులో ఉంటాయి. సెటాప్ బాక్స్, డివీడి ప్లేయర్‌, గేమింగ్ బాక్స్, డిగిటల్ కెమేరా, కామ్‌ కోడర్  వీసిపి మరియు వీసిఆర్ వంటి పరికరాలనుటీవీకి కలపడానికి దీనినివాడతారు. ఇప్పటికిదీనిని విరివిగానే వాడుతున్నారు.

స్టీరియో/కాంపోజిట్ వీడియో

యస్-వీడియో:

యస్-వీడియో లేదా సెపరేట్ వీడియో కాంపోజిట్ కేబుల్ కన్నా నాణ్యతతో కూడిన చిత్రాన్ని అందించును. సాధారణంగా టీవీట్యూనర్లు, సెటాప్ బాక్సులు మరియు డీవీడీ ప్లేయర్లలో మనకి ఎక్కువగా కనిపిస్తుంది. ఇది కూడా అన్ని టీవీలకు అందుబాటులో ఉంటుంది.

యస్-వీడియో

కాంపోనెంట్ వీడియో:

ఇది స్టీరియో/కాంపోజిట్ వీడియో కన్నా మెరుగైన చిత్రాన్ని అందించును. దీనికి హెచ్‌డి సాంకేతాలను మోసుకెళ్ళే సామర్ధ్యం కలదు. ఇది సాధారణంగా డీవీడీ/ బ్లూరే ప్లేయర్లలో ఉంటుంది. ఇప్పుడు వచ్చే అన్ని హెచ్‌డి టీవీలలో ఉంటుంది. ఇది దృశ్యాలను మాత్రమే అందిస్తుంది, ధ్వనికోసం వేరే కనక్టర్ ని వాడాలి.

కాంపోనెంట్ వీడియో

ఈథర్‌నెట్ పోర్ట్:

ఈ మధ్య వచ్చే అన్ని స్మార్ట్ టీవీలు ఈథర్‌నెట్ పోర్టును కలిగి ఉంటున్నాయి. ఇది మన టీవీ లోనే నెట్లో ఉన్న వీడియోలు, ఫొటోలు చూడడానికి ఉపయోగపడుతుంది. స్మార్ట్ టీవీ లలో ఉన్న వివిధ నెట్ ఆధారిత ఆప్లికేషన్‌లు ఉపయోగించుకోవడాకి (వెబ్ బ్రౌజర్, స్కైప్ మొదలైనవి) ఇది తప్పనిసరి. కొన్ని టీవీ లలో అయితే నేరుగా వైఫి చిప్ అమర్చబడి ఉండడం వలన ఎటువంటి వైర్లు లేకుండానే మనం అంతర్జాలానికి అనుసంధానం కావచ్చు.

ఈథర్‌నెట్ పోర్టు

ఆప్టికల్ డిజిటల్ ఆడియో:

దీనిని ఉపయోగించి టీవీ ని హోమ్‌ ధియేటర్ సిస్టంకి అనుసంధానించవచ్చు. ఇది కూడా ఇప్పుడు వచ్చే అన్ని టీవీలలో ఉంటుంది. డీవీడీ ప్లేయర్లలో మరియు గేమింగ్ బాక్సు లలో మనకి కనిపించును.

ఆప్టికల్ డిజిటల్ ఆడియో పోర్ట్

మీ మొబైల్ నెట్ వేగం తెలుసుకోండిలా

 మొబైళ్ళు, టాబ్లెట్లు అందరికి వివిధ ధరలలో అందుబాటులో కి రావడం వలన సెల్యులార్ నెట్‌వర్క్ కంపెనీలు కూడా ఆకర్షణీయమైన ధరలకు డాటాని అందిస్తున్నాయి. ఈ మధ్య అన్ని నెట్‌వర్క్ కంపెనీలు కూడా వివిధ రకాల డాటా పధకాలతో(2G,3G మరియు 4G అని) మన ముందుకు వస్తున్నాయి. పధకం ఏదైనా ఇక్కడ వేగం, డాటా పరిమాణం బట్టి చెల్లింపు ఆధారపడి ఉంటుంది. అసలు మనం మొబైల్లో వాడే నెట్ వేగం ఎంతవుంటుంది. నెట్‌వర్క్ కంపెనీ వాడు చెప్పిన వేగం మనం పొందుతున్నామా అని తెలుసుకోవాలంటే ఎలా? 
 సాధారణంగా మనం కంప్యూటర్ కి ఉన్న నెట్ యొక్క వేగాన్ని తెలుసుకోవడానికి http://www.speedtest.net అన్న సైటులోకి వెళ్ళి తెలుసుకుంటాము. అదే విధంగా మన మొబైళ్ళ నెట్ కనెక్షన్ వేగం తెలుసుకోవాలంటే స్పీడ్‌టెస్ట్ వారి ఈ మొబైల్ ఆప్ మనకి ఉపయోగపడుతుంది. ఫెడరల్ కమ్యూనికేషన్ కమీషన్ వారిచే తయారుచేయబడిన ఈ ఒపెన్ సోర్స్ ఆప్ విండోస్, ఐ ఫోన్ మరియు ఆండ్రాయిడ్ ఫోన్‌లలో మనం ఇన్‌స్టాల్ చేసుకోవచ్చు. దీనిని ఉపయోగించి 2G,3G మరియు 4G నెట్‌వర్క్‌ల వేగం తో పాటు మనకి అందుబాటులో ఉన్న  వైఫి కనెక్షన్ల వేగం కూడా తెలుసుకోవచ్చు. ఆండ్రాయిడ్ ఫోన్‌లు వాడుతున్నవారు ఇక్కడ నుండి ఉచితంగా ఈ ఆప్‌ని పొందవచ్చు.

ఆండ్రాయిడ్ లో స్పీడ్‌టెస్ట్ ఆప్

ఆండ్రాయిడ్ ఫోన్‌లో సైనోజెన్‌మోడ్ ని ఇన్‌స్టాల్ చేయడం

 మొన్న విడుదలైన సైనోజెన్‌మోడ్ ఇన్‌స్టాలర్ తో సైనోజెన్‌మోడ్ కస్టమ్‌ రామ్‌ ని ఆండ్రాయిడ్ ఫోన్‌లో ఇన్‌స్టాల్ చేసుకోవడం చాలా సులభమైపోయింది. మనం ఎలా అయితే ఒక సాఫ్ట్‌వేర్ ని మన కంప్యూటర్లో ఇన్ స్టాల్ చేసుకుంటామో అంత సులభంగా మన ఫోనులో కూడా సైనోజెన్‌మోడ్ ని ఇన్‌స్టాల్ చేసుకోవచ్చు. సైనోజెన్‌మోడ్ కస్టమ్‌ రామ్‌ ని ఆండ్రాయిడ్ ఫోన్‌లో ఇన్‌స్టాల్ చేసుకోవడానికి కావలసినవి, ముందుగా తీసుకోవలసిన జాగ్రత్తల కోసం ఇక్కడ చూడండి. అంతా సిద్దంగా ఉంటే కనీసం 20 నిమిషాలలో అయిపోతుంది. మన నెట్ వేగాన్ని బట్టి సమయం పడుతుంది. 
 మొదట సైనోజెన్‌మోడ్ ఇన్‌స్టాలర్ ఆప్ ని ఇక్కడ నుండి దింపుకుని మన ఫోన్‌లో ఇన్‌స్టాల్ చేసుకోవాలి.
https://play.google.com/store/apps/details?id=org.cyanogenmod.oneclick
  సైనోజెన్‌మోడ్ ఇన్‌స్టాలర్ ఆప్ ని ఫోన్‌లో తెరిచి అది చెప్పినట్లు చేసుకుంటూ పోవడమే. ఎలా అన్నది క్రింది చితాలలో చూడండి.






సైనోజెన్‌మోడ్ సైటు నుండి విండోస్ ఇన్‌స్టాలర్ ని డౌన్‌లోడ్ చేసుకొని కంప్యూటర్లో ఇన్‌స్టాల్ చేసుకోవాలి

ఫోన్‌ని యుయస్‌బి కేబుల్ తో కంప్యూటర్‌కి అనుసంధానించాలి


యాంటీ వైరస్ ని డిసేబుల్ చెయ్యాలి








వాల్యూం కీ లను పైకి క్రిందకి వెళ్ళడానికి పవర్ కీని సెలెక్ట్ చేసుకోవడానికి వాడాలి





Exit ని నొక్కి ఫోన్‌ని కంప్యూటర్ నుండి వేరుచేయాలి





సైనోజెన్‌మోడ్ చక్రం రెండు నిమిషాలు తిరుగుతు ఆపరేటింగ్ సిస్టం ఇన్‌స్టాల్ చేయబడుతుంది

ఇక ఫోన్ మనం వాడుకోవడానికి తయారయినట్లే





సైనోజెన్‌మోడ్ హోం స్క్రీన్



 సైనోజెన్‌మోడ్ ని ఇన్‌స్టాల్ ఎలా చెయ్యాలి అని ఈ హెచ్‌డి వీడియోలో చూడండి.