ఇంకా మన దగ్గర విడుదలకాని ఫైర్ ఫాక్స్ మొబైల్ ఒయస్ చిత్రాలు

 ప్రముఖ ఒపెన్ సోర్స్ సాఫ్ట్వేర్ అయిన ఫైర్ ఫాక్స్ ఇప్పుడు మొబైల్ రంగంలోకి ప్రవేశించింది. ఫైర్ ఫాక్స్ ఒయస్ పేరుతో ఒపెన్ సోర్స్ మొబైల్ ఆపరేటింగ్ సిస్టం విడుదలచేసింది. ఇప్పటికే జెటియి మరియు ఆల్కాటెల్ ఫైర్ ఫాక్స్ ఒయస్ తో ఫోన్లని విడుదల చేసినప్పటికి ఇంకా మన దేశంలో విడుదలకాలేదు. లినక్స్ కర్నెల్ పై నిర్మించబడిన ఈ మొబైల్ ఒయస్ హెచ్.టి.యం.యల్.5 ఆధారంగా తయారుచేయబడినది. తొదరలొనే యల్.జి మరియు సోని కంపెనీలు ఫైర్ ఫాక్స్ ఫోన్లని విడుదలచేయబోతున్నాయి.
 ఇక ఆపరేటింగ్ సిస్టం విషయానికొస్తే తక్కువ సామర్ధ్యం గల పరికరాలలో వేగంగా పనిచేయడానికి అనువుగా దీనిని తయారుచేసారు. ఫైర్ ఫాక్స్ మొబైల్ ఆపరేటింగ్ సిస్టం యొక్క చిత్రాలు చూడండి.
 
హోంస్క్రీన్
 
నోటిఫికేషన్

వెబ్ అప్లికేషన్లు

ఫోన్ డయలర్

అప్లికేషన్లు

ఆప్ ల కోసం మార్కెట్ ప్లేస్

పరిచయాలను చేర్చుకోవడం

తెలుగు వికిపీడియా ఆప్
తెలుగు బానే చూపిస్తున్న వెబ్ బ్రౌజర్
పేస్ బుక్ అప్

కంప్యూటర్లో మొబైల్ వెబ్ సైటులు, మొబైల్లో డెస్క్ టాప్ వెబ్ సైటులు చూడడానికి

 కంప్యూటర్ ద్వారా మనం ఒక వెబ్ సైటును తెరిచినపుడు మన వెబ్ బ్రౌజర్ వెబ్ పేజి యొక్క పూర్తి రూపాన్ని మనకు దానంతట అదే మన తెర పరిమాణమునకు అనుగుణంగా మార్చి మనకు చూపిస్తుంది. అందువలన కంప్యూటర్లో మనకి వెబ్ సైటు యొక్క మొబైల్ రూపం కనిపించదు. ఫోన్లకి అనువుగా ఉండడం కోసం వెబ్ సైటు యొక్క మొబైల్ రూపం మామూలు వెబ్ పేజికన్నా తక్కువ డాటాని వాడుకుంటు తొందరగా లోడ్ అవుతుంది. కనుక నెట్ తక్కువ వేగం కలిగిన వారు వెబ్ సైట్ల యొక్క మొబైల్ రూపాన్ని ప్రయత్నించవచ్చు. మొబైల్ ద్వారా అంతర్జాలం చూడడం బాగా పెరిగిన ఈరోజుల్లో అన్ని ప్రముఖ వెబ్ సైటులు మరియు బ్లాగులు ప్రత్యేకంగా మొబైల్ రూపాన్ని కూడా అందిస్తున్నాయి. మీరు మీ బ్లాగును మొబైళ్ళకి అనుగుణంగా మార్చుకోవాలనుకుంటే ఇక్కడ చూడండి. ఒక వెబ్ సైటు యొక్క మొబైల్ రూపాన్ని మనం డెస్క్ టాప్ లో చూడాలనుకుంటే వెబ్ చిరునామా చివరన ?m=1 అని ఇవ్వాలి. ఉధాహరణకు www.spveerapaneni.blogspot.com సైటు మొబైల్ రూపాన్ని మనం చూడాలనుకుంటే www.spveerapaneni.blogspot.com/?m=1 అని వెబ్ చిరునామాని ఇవ్వాలి.
 వెబ్ సైట్ యొక్క మొబైల్ రూపం తక్కువ ఆప్షన్లతో వేగంగా లోడ్ అయ్యేవిధంగా ఉండడం వలన డెస్క్ టాప్ వెర్షనులో ఉన్న అన్ని ఆప్షన్లు మొబైల్ రూపంలో అందుబాటులో ఉండవు. మనం మొబైల్ నుండి ఒక వెబ్ సైటుని తెరిచినపుడు ఆ సైటు యొక్క మొబైల్ రూపం అందుబాటులో ఉంటే మన మొబైల్ బ్రౌజర్ ఆ సైటు యొక్క మొబైల్ రూపాన్ని మాత్రమే చూపించును. మనం ఎప్పుడైనా అవసరం ఉండి మొబైల్లో వెబ్ సైటు యొక్క డెస్క్ టాప్ వెర్షన్ని చూడాలనుకుంటే మన మొబైల్ బ్రౌజర్ లో "request desktop site" అన్న ఆప్షన్ని క్రింది చిత్రంలో చూపించినట్లు ఎంచుకుంటే సరి.

మొబైల్లో వెబ్ సైటు యొక్క డెస్క్ టాప్ వెర్షన్ని చూడాలనుకుంటే

వంపులు తిరుగుతు వయ్యారాలు పోతున్న ఫోన్లు

 ఫోన్ అన్నది ఫోన్ మాట్లాడుకోవడానికే మాత్రమే కాకుండా ఆటలు ఆడడానికి, ఫొటోలు, వీడియోలు తీయడానికి మరియు చూడడానికి, నెట్ చూడడనికి, దార్లు వెతుక్కోవడానికి మరియు టికెట్లు బుక్ చేసుకోవడానికి వంటి వివిధ అవసరాలకు ఉపయోగించడం సాధారణమైపోయింది. దానికి తగ్గట్టుగా ఫోన్ తయారీదారులు కూడా రోజుకో కొత్త మోడల్ తో వివిధ ఫీచర్లతో ఫోన్లను తయారుచేయడం, విడుదలచేయడం జరుగుతుంది. మెన్నటి వరకు హెచ్ డి ని ఇప్పుడు ఫుల్ హెచ్ డి అని డ్యూయల్ కోర్, క్వాడ్ర కోర్ ,2 జిబి రాం , ఎక్కువ మెగా పిక్సల్ కెమేరాలు అంటూ రకరకాల ఫీచర్లతో మన ముందుకొస్తున్నాయి. 
 ఇప్పుడు కొత్తగా ఎటువంచితే అటు వంగే ఫోన్లు తయారీ మొదలు పెట్టారు. స్మార్ట్ ఫోన్ దిగ్గజం సాంసంగ్ ముందుగా గెలాక్సి రౌండ్ అని వంగే ఫోన్ని తయారుచేస్తున్నామని ప్రకటించింది. దానికి పోటిగా యల్ జి వాడు జి ఫ్లెక్స్ అని మరొక వంగే ఫోన్ని ప్రకటించాడు. ఇంకా విడుదలకాని ఈ ఫోన్ల వయ్యారాలను క్రింది చిత్రాలలో చూడవచ్చు. 
 
సాంసంగ్ రౌండ్
 
యల్ జి ఫెక్స్
 
 ఏన్ని ఫీచర్లు కలిగిఉన్న ఫోన్లను తెచ్చినా నిలిచి ఉండే బ్యాటరీ సామర్ధ్యం, వేడెక్కకుండా ఉండడం, ఫోను తరచూ ఆగిపోకుండా ఉండడం, జారిపడిన పెద్దగా దెబ్బతినకుండా ఉండే ఫోన్లనే వినియోగదారుడు మొదట ఆదరిస్తాడన్నది సత్యం. కనుక మొబైల్ ఫోన్ తయారీదారులు వంపులు వయ్యారాల పై కన్నా వినియోగదారునికి ఉపయోగపడే విధంగా కనీస అవసరాలైన నిలిచి ఉండే బ్యాటరీ సామర్ధ్యం, వేడెక్కకుండా ఉండడం, ఫోను తరచూ ఆగిపోకుండా ఉండడం, పొరపాటున జారిపడిన పెద్దగా దెబ్బతినకుండా ఉండే ఫోన్లని తయారు చేయడంపై దృష్టి పెట్టాల్సిన ఆవశ్యకత ఉంది.

వందల కొద్దీ ఫొటోలూ ఒకే క్లిక్‌తో డౌన్‌లోడ్ చేసుకోనే సాఫ్ట్వేర్ ఉచితంగా

 సాధారణంగా వివిధ వెబ్ సైట్లలో గ్యాలరీలుగా ఉంచిన సినితారల ఫొటోలు లేదా ఫేస్ బుక్ వంటి సామాజిక అనుసంధాన సైట్లలో ఉంచిన బంధుమిత్రుల ఫొటోలు మన కంప్యూటర్లో సేవ్ చేసుకోవాలంటే ప్రతి ఫొటోని తెరిచి సేవ్ ఇమేజ్ అన్న ఆప్షన్ని ఉపయోగించి సేవ్ చేసుకుంటాము. ఒకటి రెండు ఫొటోలంటే ఇలా సేవ్ చేసుకోవచ్చు. కానీ వందల ఫొటోలు డౌన్లోడ్ చేయాలంటే మాత్రం ఈ పధ్దతి పనికిరాదు. దీనివలన విసుగు, సమయం వృధా కావడం జరుగుతుంది. సగటు కంప్యూటరు వాడుకరి వందల కొద్దీ ఫొటోలూ ఒకే క్లిక్‌తో డౌన్‌లోడ్ చేసుకోవాలంటే బల్క్ ఇమేజి డౌన్లోడర్ వంటి సాఫ్ట్వేర్లు కొనుక్కోవలసిందేనా?
 అవసరం లేదు మనం డబ్బులు పెట్టకుండా ఉచితంగా వందల కొద్దీ ఫొటోలూ ఒకే క్లిక్‌తో డౌన్‌లోడ్ చేసే సాఫ్ట్వేర్ ఉచితంగా పొందవచ్చు. లైక్, షేర్, రిజిస్టర్ మరియు సబ్ స్రైబ్ చేసుకోకుండానే ఎవరైనా ఉచితంగా పొందవచ్చు. ఎందుకంటే ఇది పూర్తిగా ఒపెన్ సోర్స్ సాఫ్ట్వేర్. డౌన్లోడ్ దెమ్ ఆల్ అన్న ఫైర్ ఫాక్స్ యాడ్ ఆన్ ని ఉపయోగించి ఉచితంగా వందల కొద్దీ ఫొటోలూ ఒకే క్లిక్‌తో డౌన్‌లోడ్ చేసుకోవచ్చు. మొదట మనం డౌన్లోడ్ దెమ్ ఆల్ అను ఫైర్ ఫాక్స్ యాడ్ ఆన్ ని ఇక్కడ నుండి ఇన్ స్టాల్ చేసుకోవాలి. దీనిని ఉపయోగించి వెబ్ పేజిలో ఉన్న అన్ని ఫొటోలను, అన్ని వీడియోలను, డాక్యుమెంట్లు లేదా మనకు కావలసిన ఫొటోలు లేదా వీడియోలను మరియు గ్యాలరీలో ఉన్న అన్ని ఫొటోలను ఒకేసారి డౌన్లోడ్ చేసుకోవచ్చు. డౌన్లోడ్ దెమ్ ఆల్ ఫైర్ ఫాక్స్ యాడ్ ఆన్ ని ఎలా ఉపయోగించాలో About dTa! లో వీడియోలలో వివరించబడింది.

డౌన్ లోడ్ దెం ఆల్ యాడ్ ఆన్ ని తెరవడం
 
 డౌన్ లోడ్ దెం ఆల్ మేనేజర్ని తెరిచి అక్కడ ఉన్న + బటన్ని నొక్కినపుడు క్రింది చిత్రంలో వలే మరొక విండో తెరవబడుతుంది. దానిలో మనం డౌన్ లోడ్ చేయాలనుకున్న గ్యాలరీకి సంభందించిన వెబ్ చిరునామాని మరియు ఎక్కడ సేవ్ చెయ్యాలి అన్నదాన్నిని సెట్ చేసుకొని స్టార్ట్ బటన్ని నొక్కితే మనకు కావలసిన చిత్రాలు పూర్తి రిజొల్యూషన్ తో ఒకదాని తరువాత ఒకటి డౌన్ లోడ్ చేయబడతాయి.

డౌన్ లోడ్ దెం ఆల్ మేనేజర్

 చిత్రాల యొక్క వెబ్ చిరునామాను ఎలా ఇవ్వాలి?
  మొదట ఒక చిత్రం యొక్క వెబ్ చిరునామాను తీసుకొని దానినిలో ఫొటో యొక్క సంఖ్య ని మనకు కావలసిన చిత్రాల ను బట్టి ఆ గ్యాలరీలో ఉన్న చిత్రాల సంఖను బట్టి [ఈ చిత్రం నుండి:ఈ చిత్రం వరకు] ఇలా మార్చుకోవాలి. ఉదాహరణకు www.example.org లో వంద చిత్రాలు ఉన్నాయనుకుంటే మొదటి చిత్రం యొక్క చిరునామా www.example.org/image1.jpg అనుకుంటే 1ని [1:100] గా మార్చుకోవాలి. అపుడు ఆ చిరునామా ఇలా ఉంటుంది. www.example.org/image[1:100]. ఆ చిరునామాని డౌన్ లోడ్ దెం ఆల్ మేనేజర్లో ఇచ్చి అన్ని చిత్రాలను ఒకేసారి డౌన్ లోడ్ చేసుకోవచ్చు.

మీ బ్లాగును మొబైళ్ళలో చూడడానికి అనువుగా మార్చుకోవడానికి

 ఫోన్లు, టాబ్లెట్ల వంటి పరికరాలు మనకి కావలసిన ధరలలో అందుబాటులో ఉండడం, తక్కువ మొత్తం రీచార్జి చేసుకొని కూడా మొబైల్ నెట్ వాడుకొనే సౌలభ్యం, ప్రయాణాంలో ఉన్నప్పుడు, కంప్యూటర్ అందుబాటులో లేనపుడు, ఎక్కడ నుండి అయినా నెట్ వాడుకోగలిగే వెసులుబాటు ఉండడం వలన ఇప్పుడు మొబైల్ పరికరాలు(మొబైళ్ళు, టాబ్లెట్లు) ద్వారా కూడా బ్లాగులు చదువుతున్నవారు మునుపటితో పోల్చితే గణనీయంగా పెరిగారు.
 మీ బ్లాగు మొబైళ్లలో కూడా కనిపిస్తున్నప్పటికి అది డెస్క్ టాప్ కి ఉద్దేశించినది కనుక అది మొబైల్ పరికరాలలో చూడడానికి, చదవడానికి కొంత అసౌకర్యంగా(ఫాంట్ పరిమాణం, పేజి లోడ్ అవడానికి ఎక్కువ సమయం తీసుకోవడం, ఎక్కువ నెట్ డాటాని వాడుకోవడం మరియు క్రిందికి పైకి కాకుండా ప్రక్కలకి కూడా జరిపి చూడాల్సిరావడం)ఉంటుంది. అందువలన మన బ్లాగును మొబైల్ వీక్షకులు కూడా చూడడానికి అనుకూలంగా మార్చడం తప్పనిసరి.
మొబైల్లో డెస్క్ టాప్ సైటు

















మొబైళ్ళలో చూడడానికి అనువుగా ఉన్న మొబైల్ సైటు

 బ్లాగు టెంప్లెట్ సెట్టింగ్స్ లో మొబైల్ పరికరాల్లో మొబైల్ టెంప్లెట్ ని చూపించు అని అమర్చితే దానంతట అదే మొబైళ్ళకి అనుకూలమైన ఫాంటు పరిమాణం, పరికరం యొక్క తెర పరిమాణానికి అణుగుణంగా మన బ్లాగును మార్చి చూపించును. టెంప్లెట్ సెట్టింగ్స్ లో మొబైళ్లకి ప్రత్యేకంగా ధీములు కూడా ఉన్నాయి. మనకి నచ్చిన ధీమును ఎంచుకోవచ్చు. ప్రివ్యూ కూడా చూసుకోవచ్చు.
బ్లాగు టెంప్లెట్ సెట్టింగ్స్ లో మొబైల్ టెంప్లెట్ సెట్టింగ్స్ 

తెలుగు నేర్చుకున్న టీవీ

 కంప్యూటర్లు, మొబైళ్ళు ఇప్పటికే తెలుగు అక్షరాలను చూపించగలుగుతు ఉన్నప్పటికి ఇంకా చాలా మొబైళ్ళు మాత్రం డిఫాల్ట్ గా తెలుగుని చూపించలేకపోవడం విచారించవలసిన విషయం. అయితే ఈ నేపధ్యంలో తెలుగు చూపించగలిగే పరికరాలకోసం వెతుకుతు టీవీల పై దృష్టి సారించగా టీవీలలో ఇప్పటికే ఒ.యస్.డి భాషగా హింది వంటి భారతీయ భాషలు ఉపయోగించబడినాయి. కాని నావరకు తెలుగు అక్షరాలను టీవీలలో ఇప్పటి వరకు చూడలేదు. పెన్ డైవ్ పెట్టుకొనే సధుపాయం ఉన్న నా సాంసంగ్ 32' యల్.ఇ.డి టీవీలో తెలుగు కనిపించవచ్చునేమో అనే ఆశతో చిన్న ప్రయోగం చేసాను. కొన్ని mp3 పైళ్ళను తీసుకొని వాటి మెటా డాటా(పాట, సినిమా,పాడినవారు వంటివి) ని తెలుగులోకి  మార్చి టీవీలో ప్లే చేసినపుడు తెలుగు అక్షరాలను టీవీ ఇలా చూపించింది.



తెలుగు అక్షరాలను సరిగా చూపిస్తున్న సాంసంగ్ టీవీ       

రూట్ చేయబోయే ముందు ఆండ్రాయిడ్ ఫోను బ్యాకప్ తీసుకోండిలా

 ఆండ్రాయిడ్ ఫోను రూట్ చేయబోయే ముందు ఆండ్రాయిడ్ ఫోను బాక్ అప్ తీసుకోవడం మంచిది. రూట్ చేసిన ఫోన్లకి మన డాటా తో పాటు పూర్తిగా ఆపరేటింగ్ సిస్టం బ్యాకప్ తీసుకోవడానికి వివిధ అప్లికేషన్లు అందుబాటులో ఉన్నాయి. కానీ రూట్ చెయ్యని ఫోన్లకి మనం మన డాటా మాత్రమే అనగా మన ఫోన్ నంబర్లు, మెసేజిలు, అప్లికేషన్లు ఫొటో మరియు వీడియోలును బ్యాకప్ తీసుకోవచ్చు. రూట్ చెయ్యాలన్న ఆలోచన లేనప్పటికి మనం మన ఫోనులో ముఖ్యమైన సమాచారాన్ని బ్యాకప్ తీసుకుంటే ఫోన్ చెడిపోయినప్పుడు కాని, ఫొన్ కనిపించకుండా పోయినప్పుడు కాని, కొత్త ఫోను కొన్నప్పుడు కాని మనం తిరిగి మన సమాచారాన్ని తిరిగి పొందేందుకు వీలవుతుంది. ఎటువంటి పరిజ్ఞానం లేకపోయినా ఎవరైనా తమ ఫోనులో ఉన్న సమాచారాన్ని బ్యాకప్ తీసుకోవచ్చు, అవసరమైనప్పుడు తిరిగి వాడుకోవచ్చు. ఆండ్రాయిడ్ ఫోనులో ఉన్న మన సమాచారాన్ని బ్యాకప్ తీయడానికి గల వివిధ పధ్దతులు క్రింద ఇవ్వబడ్డాయి.
 
 
 
 1) మన ఫోనుని గూగుల్ ఖాతాకి అనుసంధానించి ఉండి మనకి మొబైల్ కి నెట్ అందుబాటులో ఉంటే మనం క్రింది చిత్రంలో చూపించినట్లు బ్యాకప్ సెట్ట్ంగులని మార్చుకుంటే మన అప్లికేషన్ సెట్టింగులు, వైఫి పాస్ వర్డ్ లు, ఫొటోలు, ఫోన్ నంబర్లు అన్ని అటోమెటిక్ గా మన గూగుల్ అకౌంట్ లో బధ్రపరచబడతాయి. బ్యాకప్ తీయబడిన సమాచారం తిరిగి అటోమెటిక్ గా మన ఫొన్లోకి రిస్టోర్ చేసుకోవచ్చు. ఈ విధానంలో మెసేజిలు,వీడియోలు, సంగీతం మరియు అప్లికేషన్లు బధ్రపరచబడవు.
 
ఆండ్రాయిడ్ బ్యాకప్ సెట్టింగ్స్

  2) గూగుల్ డ్రైవ్, డ్రాప్ బాక్స్, ఉబుంటు వన్, కాపీ వంటి వివిధ క్లౌడ్ సర్వీసులు కొంత స్టోరేజిని ఉచితంగా అందిస్తున్నాయి. ఆయా క్లయింట్లని ప్లే స్టోర్ ద్వారా ఇంస్టాల్ చేసుకొని వాటిలో మన సమాచారాన్ని నిల్వచేసుకోవచ్చు. వాటిలో ఉంచిన సమాచారం మనం ఎక్కడి నుండి అయిన వాడుకోవడానికి అవకాశం ఉంది. పై రెండు పధ్దతులలో మనకి నెట్ అవసరం ఉంటుంది.
 
 3) నెట్ అవసరం లేకుండా మనం మన ఫొన్ నంబర్లు మరియు ఫొటోలు, వీడియోలు మరియు సంగీత ఫైళ్ళని మనం నేరుగా మన కంప్యూటరులోకి యు.యస్.బి కేబుల్ ద్వారా కాపీ చేసుకోవచ్చు. కావలసినప్పుడు తిరిగి ఫోన్లోకి కాపీ చేసుకొని వాడుకోవచ్చు. ఫోన్ నంబర్లను క్రింది చిత్రంలో వలె ఎక్స్ పోర్ట్ చేసుకుని ఒక ఫైల్ రూపంలో స్టోర్ చేసుకోవచ్చు. అపుడు .vfc ఫార్మాటులో మన కాంటాక్టులన్ని(ఫోన్ నంబర్లు, ఇ మెయిల్ ఐడిలు) బధ్రపరచబడతాయి. దానిని మనం యస్.డి. కార్డులో కానీ కంప్యూటర్లో గాని దాచుకొని కావలసినప్పుడు తిరిగి ఇంపోర్ట్ చేసుకోవచ్చు.

ఆండ్రాయిడ్ ఫోన్లో ఫోన్ నంబర్లు దాచుకోవడం  

ఫోన్ నుండి ఉబుంటు 13.10 ఆపరేటింగ్ సిస్టం ఉన్న కంప్యూటర్లోకి నేరుగా ఫైళ్ళని కాపీ చేయడం
 
 4) మన ఫోన్లో ఉన్న అప్లికేషన్లని బ్యాకప్ తీసుకోవాలంటే ఈ ప్రత్యేక సాఫ్ట్వేర్ కావలిసిందే. ఆప్ బ్యాకప్ రిస్టోర్ అన్న అప్లికేషన్ని ఇక్కడ నుండి ఉచితంగా ఇన్ స్టాల్ చేసుకోవచ్చు. ఈ ఆప్ ని ఉపయోగించి మనకి కావలసిన అప్లికేషన్లను ఒకే సారి యస్.డి. కార్డు లోకి బ్యాకప్ తీసుకోవచ్చు. తిరిగి మనకి కావలసిన అప్లికేషన్లను అన్నిటిని ఒకేసారి ఫోనులోకి రిస్టోర్ చెసుకోవచ్చు.

ఆండ్రాయిడ్ అప్లికేషన్లని బ్యాకప్ తీసే ఆప్ బ్యాకప్& రిస్టోర్
 
 5) చివరి అతి ముఖ్యమైనది మన మొబైల్ డాటా అనగా ఫోన్ నంబర్లు, మెసేజిలు, కాల్ లాగ్ మరియు క్యాలెండరు సమాచారాన్ని బ్యాకప్ తీయడం. ఈపనికి మొబైల్ బ్యాకప్ అనే అప్లికేషను మనకి ఉపయోగపడుతుంది. దీనిని మనం ఇక్కడ నుండి ఉచితంగా ఇన్ స్టాల్ చేసుకోవచ్చు. ఈ అప్లికేషన్ని ఉపయోగించి ఫోన్ నంబర్లు, మెసేజిలు, కాల్ లాగ్ మరియు క్యాలెండరు సమాచారాన్ని యస్.డి. కార్డు లోకి బ్యాకప్ తీసుకొని తిరిగి కావలసినప్పుడు రిస్టోర్ చేసుకోవచ్చు.
 
ఫోన్ నంబర్లు, మెసేజిలు, కాల్ లాగ్ మరియు క్యాలెండరు సమాచారాన్ని బ్యాకప్ తీసే మొబైల్ బ్యాకప్

పైరేటెడ్ సాఫ్ట్వేర్ వాడుకర్లకి శుభవార్త ! ప్రపంచంలో ఎక్కువగా వాడబడుతున్న ఉచిత ఆపరేటింగ్ సిస్టం విడుదలైంది.

 ఇప్పుడే ప్రపంచంలో ఎక్కువగా వాడబడుతున్న ఉచిత ఒపెన్ సోర్స్ ఆపరేటింగ్ సిస్టం విడుదలైంది. దానితో పాటు ఫోన్లకి, టాబ్లెట్లకి, లాప్ టాప్, డెస్క్ టాప్, సర్వర్లలో వాడుకోవడానికి వివిధ ఆపరేటింగ్ సిస్టములు విడుదలైనాయి. విశేషం ఏమిటంటే వీటిని ఎవరైనా ఉచితంగా డౌన్లోడ్ చేసుకొని వాడుకోవచ్చు. చట్టపరంగానే డబ్బులు కట్టకుండా ఎన్ని కంప్యూటర్లలో అయిన ఇన్ స్టాల్ చేసుకోవచ్చు. ఎటువంటి లైసెన్స్ కీలు అవసరం లేదు. మీ ఆపరేటింగ్ సిస్టం నకిలీదని పదేపదే విసిగించదు. పైరేటెడ్ సాఫ్ట్వేర్ నుండి విముక్తి కావడానికి ఇదే సరైన అవకాశం.   
 ఉబుంటు 13.10 ఇప్పుడే విడుదలైంది. దానితో పాటు ఉబుంటు టచ్ 1.0(ఫోన్లకి మరియు టాబ్లెట్లకి), ఉబుంటు సర్వర్ మరియు లాప్ టాప్, డెస్క్ టాప్ కొరకు కుబుంటు, లుబుంటు, క్షుబుంటు, ఎడ్యుబుంటు, ఉబుంటు స్టుడియో, ఉబుంటు గ్నోం,  ఉబుంటు కైలిన్ లు కూడా విడుదలైనాయి. 
ఉబుంటు డెస్క్ టాప్

ఉబుంటు ఫోన్

 ఇప్పటికే ఉబుంటు వాడుతున్నవారు కొత్త వెర్షన్ కి డబ్బులు చెల్లించకుండానే ఉచితంగా అప్ గ్రేడ్ చేసుకోవచ్చు. ఎలా అనేది ఇక్కడ చూడవచ్చు. కొత్త ఫీచర్లతో విడుదలైన ఉబుంటు 13.10 గురించి పూర్తి విశేషాలు వీడియోలు ఇక్కడ చూడవచ్చు. మిగిలిన ఆపరేటింగ్ సిస్టములలో కొత్తగా వచ్చిన మార్పులని ఇక్కడ చూడవచ్చు.
 ఉబుంటు మరియు మిగిలిన ఆపరేటింగ్ సిస్టములు క్రింది లింకుల నుండి ఉచితంగా డౌన్లోడ్ చేసుకోవచ్చు.

ఫోన్ రూట్ చేయబోయే ముందు తీసుకోవలసిన జాగ్రత్తలు

 ఆండ్రాయిడ్ ఫోన్ రూట్ అంటే ఏంటి? లాభాలు నష్టాలు, మన ఫోన్ ఇప్పటికే రూట్ చేయబడిందా లేదా ఎలా తెలుసుకోవాలి అన్న విషయాలు ముందు టపాలలో వివరించబడింది. ఈ టపాలో ఆండ్రాయిడ్ ఫోన్ రూట్ చేయబోయే ముందు తీసుకోవలసిన జాగ్రత్తలు తెలుసుకుందాము. రూటింగ్ సాధారణంగా అన్ని తయారుగా ఉంటే పది నిమిషాల్లో అయిపోతుంది. అంతగా పరిజ్ఞానం లేనివారు కూడా సులభంగా చేసుకోవచ్చు. అంతా సవ్యంగా జరగాలంటే ముందు జాగ్రత్తలు తప్పనిసరిగా పాటించాల్సిందే.

  • మన ఫొన్ యొక్క మోడల్ నంబర్, ఆండ్రాయిడ్ వెర్షన్, బిల్డ్ నంబర్ వంటి వివరాలు వ్రాసి పెట్టుకోవాలి. సెట్టింగ్స్ లో అబౌట్ ఫోన్ లో ఈ వివరాలు ఉంటాయి. 
  • ప్రతి ఫోన్ కి , ప్రతి ఆండ్రాయిడ్ వెర్షన్ కి వేరువేరు రూటింగ్ పద్దతులు ఉంటాయి కనుక మన ఫోన్ కి సరిపడే తాజా పద్దతిని నెట్ లో వెతికి పట్టుకోవాలి.
  • ఫోన్ రూటింగ్ ని వివరించే సైట్లు చాలా ఉన్నా XDA డెవలపర్స్ సైనోజెన్ మోడ్ వంటి నమ్మకమైన సైట్లను మాత్రమే పరిగణలోకి తీసుకోవాలి.
  • మనం ఫోన్ రూటింగ్ ఎందుకు చేయాలనుకుంటున్నాము అన్నది ఖచ్చిత మైన అవగాహన ఉండాలి. మనం రూటింగ్ చెయ్యాలన్న కారణం అది మన ఫోన్లో పనిచేస్తుందా అన్నది కూడా ముందే తెలుసుకోవాలి. ఉధాహరణకు మనం కస్టం రాం ఇన్ స్టాల్ చేయాలనుకొంటే మన ఫోన్ కి సరిపడా రాం అందుబాటులో ఉందా అన్నది తెలుసుకోవాలి. వీలైతే ముందుగా డౌన్లోడ్ చేసి పెట్టుకోవాలి. అదే విధంగా రూటింగ్ , కస్టం రాం ఇన్ స్టాల్ చేయడానికి కావలసిన సాఫ్ట్వేర్లను మరియు  ముందుగా డౌన్లోడ్ చేసి పెట్టుకోవాలి.
  • రూట్ చేస్తున్నప్పుడు వచ్చే సమస్యలను గురించి ముందే అవగాహన పెంచుకోవాలి. దానివలన రూట్ చేసేటప్పుడు జరగరానిది జరగకుండా నివారించవచ్చు.
  • మన ఫోన్ కి సంబందించిన డ్రైవర్లను అంటే కంప్యూటర్ మన ఫోన్ ని గుర్తిచడానికి కావలసిన డ్రైవర్లను తయారిదారు వెబ్ సైటు నుండి డౌన్లోడ్ చేసుకొని ఇన్ స్టాల్ చేసుకోవాలి.
  • సెట్టింగ్స్ లో డెవలపర్ ఆప్షన్స్ లో యు.యస్.బి డిబగ్గింగ్ అన్న ఆప్షన్ ని ఏంచుకోవాలి.
  • రూట్ చేయడానికి ముందే ఫోన్ పూర్తిగా చార్జ్ చేసుకోవాలి.
  • రూట్ చేయబోయే ముందు మన కంప్యూటర్లో యాంటీ వైరస్ మరియు ఫైర్ వాల్ ను డిసేబుల్ చేసుకోవాలి.
  • చివరగా ముఖ్యమైనది రూట్ చేసేటప్పుడు పొరపాటు జరిగితే డాటా కోల్పోయే అవకాశం ఉంది కనుక ఫోన్ నంబర్లు, మెసేజ్, అప్లికేషన్, ఫొటోలు, ఫోన్ స్టోరేజి లో ఉన్న అన్ని ముఖ్యమైన ఫైళ్ళని బాక్ అప్ తీసుకోవాలి. 

ఫోన్ రూట్ చెయ్యబడిందో లేదో తెలుసుకోవడం ఎలా?

 రూట్ చేసిన ఫోన్ కూడా మామూలు ఫొన్ లాగే ఉంటుంది. దానిని గుర్తించడానికి ఫోన్ లో ప్రత్యేకమైన గుర్తులు ఏమి ఉండవు. సాధారణంగా కొత్తగా ఫోన్ కొన్నప్పుడు రూట్ అకౌంట్ లాక్ చేయబడి ఉంటుంది. మనం పాత మొబైల్ వేరే వాళ్ళ దగ్గర నుండి కాని ఆన్ లైన్ లో కాని కొన్నపుడు ఆ మొబైల్ రూట్ చేయబడి ఉందో లేదో తెలుసుకోవాలి. ఎందుకంటే రూట్ చేసిన ఫోన్ లో ఏవైనా హనికర అప్లికేషన్లు (సమాచారాన్ని దొంగిలించే లేదా నాశనం చేసే) ఉంచి మనకి అంటగట్టవచ్చు. లేదా తక్కువ కాన్ఫిగరేషన్ ని ఎక్కువగా చూపించి మోసం చేయవచ్చు. అందువలన సెకండ్ హెండ్ పరికరాలు కొనే ముందు తప్పని సరిగా రూట్ చేయబడి ఉందో లేదొ చూసుకోవాలి. సాధారణంగా రూట్ చేయబడిన ఫోన్ లో "సుపర్ సు" అనే అప్లికేషన్ ఇన్ స్టాల్ చేయబడి ఉంటుంది. దానిని బట్టి మనం రూట్ చేయబడిన ఫోన్ ని గుర్తించవచ్చు. కానీ కొన్ని పద్దతులలో సుపర్ సు ఉండకపోవచ్చు. అలాంటప్పుడు మొబైల్ కాని టాబ్లెట్ కాని రూట్ చేయబడిందో తెలిపే ఈ అప్లికేషన్ ను ఇన్ స్టాల్ చేసి తెలుసుకోవచ్చు. 


 ప్లే స్టోర్ నుండి రూట్ చెకర్ బేసిక్ అన్న అప్లికేషన్ని ఇన్ స్టాల్ చేసుకోవాలి. అప్లికేషన్ ఇన్ స్టాల్ అయిన తరువాత ఆ అప్లికేషన్ని తెరిచి "వెరిఫై రూట్ యాక్సిస్" అన్న బటన్ ని నొక్కితే మనకి మన డివైస్ రూట్ చేయబడిందో లేదో చూపిస్తుంది.

ఆండ్రాయిడ్ రూట్ చేయడం అంటే ఏమిటి? రూట్ చేయడం వలన లాభాలు, నష్టాలు

ఆండ్రాయిడ్ రూట్ చేయడం అంటే ఏమిటి? 

 

  మన కంప్యూటర్లో ఏవిధంగా అయితే అడ్మినిస్ట్రేటర్ మరియు గెస్ట్ అకౌంట్ లు ఉంటాయో అలాగే ఆండ్రాయిడ్ ఫోన్లో కూడా ఉంటాయి. మనకి ఫోన్ తయారీదారుడు అడ్మినిస్ట్రేటర్ అకౌంట్ ని లాక్ చేసి గెస్ట్ అకౌంట్ అనుమతి మాత్రమే ఇస్తాడు. అంటే మనం మన ఫోన్ లో గెస్ట్ అకౌంట్ లోకి మాత్రమే వెళ్ళగలం అన్నమాట. లినక్స్ ఆపరేటింగ్ సిస్టం లో అడ్మినిస్ట్రేటర్ అకౌంట్ ని రూట్ అకౌంట్ అని అంటారు. సిస్టం అడ్మినిస్ట్రేటర్ పనులు చేయాలంటే మనం రూట్ అకౌంట్ కి లాగిన్ కావాల్సిందే. ఆండ్రాయిడ్ ఆపరేటింగ్ సిస్టం కూడా లినక్స్ ఆధారిత ఆపరేటింగ్ సిస్టం కావడం వలన ఆండ్రాయిడ్ అడ్మినిస్ట్రేటర్ అకౌంట్ ని రూట్ అకౌంట్ అని అంటారు. రూట్ అకౌంట్ లోకి ప్రవేశించేటట్లు మన ఫోన్ ని చేయడమే రూటింగ్. రూటింగ్ చేయడం వలన ఆపరేటింగ్ సిస్టం ఫైళ్ళను కూడా మనం మార్చవచ్చు.

రూట్ చేయడం వలన లాభాలు:

 

  • అప్లికేషన్లలో మరియు వెబ్ బ్రౌజర్ లో యాడ్స్ రాకుండా చేయ్యవచ్చు.
  • తెలుగు మరియు మనకు నచ్చిన ఫాంట్లను ఇన్ స్టాల్ చేయవచ్చు.
  • ఫోన్ ప్రాసెసర్ వేగం పెంచడం, బ్యాటరీ పనితీరు మెరుగుపరచడం చేయవచ్చు.
  • ఫోన్ కొన్నఫుడు వచ్చిన థీం మరియు అప్లికేషన్లని తొలగించవచ్చు.
  • రూట్ ఫోన్లలో మాత్రమే పని చేసే అప్లికేషన్లని ఇన్ స్టాల్ చేసుకోవచ్చు.
  • అప్ డేట్లు లేని ఫోన్లకి తాజా వెర్షన్ ఆండ్రాయిడ్ రాం ని ఇన్ స్టాల్ చేసుకోవచ్చు.
  • మనకి నచ్చిన కస్టం రాం ఇన్ స్టాల్ చేసుకోవచ్చు.
  • మనకి నచ్చిన ఐకాన్లని థీం లని ఇన్ స్టాల్ చేసుకోవచ్చు.
  • మన ఫోన్ లేదా టాబ్లెట్ ని పూర్తిగా మన ఆధీనంలోకి తెచ్చుకోవచ్చు.
  • ఫోన్ ఇంటర్నల్ మెమోరీ తక్కువ గా ఉన్నపుడు డీఫాల్ట్ ఆప్స్ కూడా యస్ డి కార్డ్ లోకి మార్చుకోవచ్చు.
  • పెన్ డ్రైవ్ ను ఫోన్ నుండి వాడుకోవచ్చు.

రూట్ చేయడం వలన నష్టాలు:

 

  • రూట్ చేయడం వలన వారెంటీ వర్తించదు. కనుక వారెంటీ గడువు అయిపోయిన తరువాత రూట్ చేసుకోవడం మంచిది.
  • రూట్ చేసేటప్పుడు మన డాటా కోల్పోవచ్చు కనుక డాటా అనగా ఫోన్ నంబర్లు, మెసేజ్ లు అన్ని బాక్ అప్ తీసుకోవాలి.
  • రూట్ చేసేటప్పుడు పొరపాటు జరిగితే ఫోన్ మొత్తానికి పని చేయక పోవచ్చు. కనుక పూర్తిగా తెలిసి ఉంటేనే రూట్ చేయడం ఉత్తమం.

మీ బ్లాగు వీక్షణలను పెంచడానికి

 మీబ్లాగును వీక్షకులకి చేరువచేయడానికి, వీక్షణలను పెంచడానికి మరియు ఆకర్షణీయంగా మార్చుకోవాలను కుంటున్నారా? అయితే ఇది మీకోసమే.
 ఏదైనా ఒక టపాను చూసిన తరువాత దానికి సంబందించిన మరిన్ని టపాలు కనిపించే విధంగా చేయడం ద్వారా వీక్షకులు మన బ్లాగును వదలకుండా చేయవచ్చు. రిలేటెడ్ పోస్ట్స్ అన్న విడ్జెట్ ని మన బ్లాగు టపా చివరన ఉంచడం ద్వారా ఆ టపాకి సంబందించిన ఇతర టపాలను కూడా ఆకర్షణీయంగా వీక్షకుడికి కనిపించేటట్లు చేయడం వలన మన బ్లాగు చూసేవారికి అనుకూలంగా మార్చవచ్చు. తద్వారా బ్లాగు వీక్షణలు పెంచుకోవచ్చు. మనకి వివిధ రకాల రిలేటెడ్ పోస్ట్స్ విడ్జెట్లు అందుబాటులో ఉన్నాయి. వాటిలో ఉత్తమమైనది లింక్ విత్ ఇన్.

ఉచిత స్వేచ్ఛా సాఫ్ట్వేర్లు బ్లాగులో రిలేటెడ్ పోస్ట్స్ విడ్జెట్

 లింక్ విత్ ఇన్ మిగిలిన రిలేటెడ్ పోస్ట్స్ విడ్జెట్ల మాదిరి మనం కావలసిన విధంగా ఎక్కువగా మార్చుకోలేనప్పటికి కూడా ఎటువంటి సైన్ అప్ అవసరం లేకపోవడం, యాడ్స్ లేకపోవడం, వేగంగా లోడ్ అవడం, ఎటువంటి కోడింగ్ పరిజ్ఞానం లేనివారు కూడా అతి తక్కువ సమయంలో సులభంగా ఇన్ స్టాల్ చేసుకోగలగడం మరియు అన్ని రకాల బ్లాగులకు తగిన విధంగా అమరిపోవడం వలన దీని గురించి వ్రాయడం జరిగింది.


  లింక్ విత్ ఇన్ ఇన్ స్టాల్ చేసుకోవడానికి మొదట ఇక్కడ మన బ్లాగు చిరునామా,మన బ్లాగు ఫ్లాట్ ఫామ్ మరియు మెయిల్ ఐడి ని ఇచ్చి గెట్ విడ్జెట్ ని నొక్కాలి. అపుడు క్రింది చిత్రంలో చూపినట్లు వెబ్ పేజి తెరవబడును. ఆ వెబ్ పేజిలో ఇన్ స్టాల్ విడ్జేట్ అన్న లంకెని నొక్కితే మన బ్లాగు లేఅవుట్ సెట్టింగ్స్ కి వెళుతుంది. అక్కడ నుండి విడ్జెట్ ని మనం ఇన్ స్టాల్ చేసుకోవచ్చు.

లింక్ విత్ ఇన్ ఇన్ స్టాల్ చేయు విధానం
 మరెందుకు ఆలస్యం మీ బ్లాగు పేజి వీక్షణలను పెంచుకోండి.

పిల్లలను పెద్దలను ఆకట్టుకునే అధిక నాణ్యత కలిగిన చిన్న యానిమేషన్ సినిమా ఉచితంగా

 ఉబుంటు, బ్లేండర్ మరియు గింప్ వంటి ఉచిత సాఫ్ట్వేర్లను ఉపయోగించి తయారుచేసిన చిన్న యానిమేషన్ సినిమా బిగ్ బక్ బన్ని. అధిక నాణ్యత కలిగిన ఈ సినిమా మాటలు లేనప్పటికి పిల్లలను ఇట్టే ఆకట్టుకుంటుంది. ఈ సినిమాని హెచ్ డి టీవి లో చూస్తే దీని నాణ్యత పెద్దవాళ్ళను కూడా ఆకట్టుకుంటుంది. ఈ సినిమాని ఉచితంగా డౌన్లోడ్ చేసుకోవచ్చు. ఎటువంటి ఆంక్షలు లేకుండా ఎవరికైనా ఇవ్వవచ్చు. ఇక్కడ నుండి బిగ్ బక్ బన్ని సినిమాను మనకు కావలసిన ఫార్మాట్లో డౌన్లోడ్ చేసుకోవచ్చు.

 

Mac కేనా డాక్?

 మన సిస్టంలో ఇన్ స్టాల్ చేయ్బడిఉన్న వివిధ అప్లికేషన్లు తెరవడానికి  సాధారణంగా డెస్క్ టాప్ ఇకాన్, మెనూ, టాస్క్ బార్, లాంచర్ వంటి వివిధ పధ్ధతులు వాడుతుంటాము. అప్లికేషన్లు తెరవడానికి తమాషా అయిన కంటికి ఇంపైన మరొక విధానమే డాక్. ఆపిల్ వాడి ఖరీదైన ఆపరేటింగ్ సిస్టం అయిన మాక్ ద్వారా ఈ డాక్ బాగా ప్రసిధ్ది చెందినది. అంత ఖరీదు పెట్టలేని, ఉచిత ఆపరేటింగ్ సిస్టం వాడేవారికి డాక్ లేదా? 
 ఉచితంగా దొరికే డాక్ లు చాలా ఉన్నాయి. వాటిలో ముఖ్యమైనది కైరో డాక్. ఇది పూర్తిగా ఉచితమే. ఇది ఉచిత స్వేచ్చా సాఫ్ట్ వేర్. ఎవరైనా ఉచితంగా ఇన్ స్టాల్ చేసుకోవచ్చు. ఇది డెబియన్, ఉబుంటు, మింట్, మరియు ఫెడోరా వంటి అన్ని ఉచిత ఆపరేటింగ్ సిస్టం లలో పనిచేస్తుంది. దీనిని మనం వాడుతున్న ఆపరేటింగ్ సిస్టం యొక్క సాఫ్ట్ వేర్ సెంటర్ అప్లికేషన్ నుండి ఇన్ స్టాల్ చేసుకోవచ్చు. కైరో డాక్ కి రకరకాల థీంలు అందుబాటులో ఉన్నాయి. అంతేకాకుండా ఇకాన్లు రూపం,పరిమాణం, కదలికలు, వాటిని నొక్కినపుడు అవి ప్రవర్తించే విధానం మరియు విండో తెరవబడు విధానం వంటి అన్ని లక్షణాలు మనకు నచ్చినట్లు మార్చుకోగలగడం లెక్కలేనన్ని ఆప్షన్లు కలిగి ఉండడం కైరో డాక్ ని మిగిలిన వాటి నుండి ప్రత్యేకంగా నిలబెడుతున్నాయి. కైరో డాక్ తక్కువ కాన్ఫిగరేషన్ గల సిస్టం లలో కూడా బాగా పనిచేస్తుంది.
ఉబుంటులో కైరో డాక్
గ్నోం డెస్క్ టాప్ పై కైరో డాక్

సెర్చ్ ఇంజన్లు వెంటాడకుండా ఉండాలంటే



 తరచు సమాచారం కోసం నెట్ లో వెతకడం సాధారణంగా అందరు చేసే పనే. కాని సెర్చ్ ఇంజన్లు మన మీద నిఘా పెడితే? అవును ఇది నిజమే. మనం వెతికిన సమాచారాన్ని ఆధారంగా సెర్చ్ ఇంజన్లు మన ఇంటర్ నెట్ అలవాట్లను గుర్తించి ఆ సమాచారాన్ని వాటి అవసరాలకు వాడుకుంటున్నాయి. మనం ఏదైనా సమాచారాన్ని వెతుకుతున్నపుడు వాటికి సంభందించిన ప్రకటనలు చూపించడం వంటి వ్యాపార అవసరాలకు మరియు వివిధ ప్రభుత్వ సంస్థల విజ్ఞప్తి మేరకు వారికి వాడుకర్ల సమాచారాన్ని అందించడం కోసం మన సమాచారాన్ని మనకి తెలియకుండా భద్రపరుస్తున్నాయి. సెర్చ్ ఇంజన్లు ఏవిధంగా మనల్ని వెంటాడుతునాయో మరింత సమాచారం ఇక్కడ చూడవచ్చు.
 మరి మనకి అవసరంగా మారిన ఈ వెంటాడే సెర్చ్ ఇంజన్లు కి ప్రత్యామ్నాయం లేదా?
 ఎందుకు లేదు? ఈ వీడియో చూడండి.



 డక్ డక్ గో అనేది మనం ఇప్పుడు వాడుతున్న  సెర్చ్ ఇంజన్ల వలే వాడుకరిని వెంటాడదు. ఇది మన సమాచారాన్ని దాచుకోదు. ఇది పూర్తిగా ఒపెన్ సోర్స్ సెర్చ్ ఇంజన్. మనం వాడే బ్రౌజర్ ఏదైనా సరే దీన్ని వాడుకోవచ్చు.

రసాయనాల విశేషాలను తెలుసుకోవడానికి

 రసాయన శాస్త్రం చదివే వారికి ఆవర్తన పట్టిక(పిరియాడిక్ టేబుల్) అనేది భగవద్గీత లాంటిది. ఆవర్తన పట్టికలో వివిధ మూలకాలు వాటి పరమాణు సంఖ్యల, ధర్మాల ఆధారంగా వరసగా అమర్చబడి ఉంటాయి. ఆవర్తన పట్టికని ఉపయోగించి సులువుగా మూలకం యొక్క రసాయన, భౌతిక మరియు అణు ధర్మాలను తెలుసుకోవచ్చు. రసాయన శాస్త్ర ఉపాధ్యాయులకి, విద్యార్ధులకి ఎంతగానో ఉపయోగపడే ఆవర్తన పట్టికని మనం మన డెస్క్ టాప్ పై ఇన్ స్టాల్ చేసుకోవచ్చు. జి ఎలిమెంటల్ అను ఉచిత సాఫ్ట్వేర్ ఇన్ స్టాల్ చేసుకొని ఆవర్తన పట్టికను మన కంప్యూటర్లో చూడవచ్చు.

జి ఎలిమెంటల్ పిరియాడిక్ టేబుల్
 జి ఎలిమెంటల్ లో మూలకాలు గ్రూప్, పిరియడ్ మరియు సీరీస్  లు గా విభజించబడి వేరువేరు రంగులలో చూచించబడి ఉన్నాయి. మూలకంపై మౌస్ ని ఉంచగానే మూలకం యొక్క పూర్తి పేరు పరమాణు సంఖ్య కనిపించును. మూలకాన్ని డబుల్ క్లిక్ చేసినపుడు ఆ మూలకం యొక్క సాధారణ, భౌతిక మరియు అణు ధర్మాలను చూపించును. ఉబుంటు వాడేవారు ఉబుంటు సాఫ్ట్వేర్ సెంటర్ నుండి జి ఎలిమెంటల్ అని వెతికి ఉచితంగా ఇన్ స్టాల్ చేసుకోవచ్చు.

రసాయనము యొక్క ధర్మాలు

ఆండ్రాయిడ్ ఫోన్లలో యాడ్స్ రాకుండా చేయడానికి

 ఆండ్రాయిడ్ ఫోన్లు వాడేవారు వివిధ ఫ్రీ ఆప్స్ ప్లే స్టోర్ నుండి ఇన్ స్టాల్ చేసుకుంటారు. ఉచితంగా లభించే ఈ ఆప్స్ లో యాడ్స్ తరచు విసిగిస్తుంటాయి. అంతే కాకుండా ఫోన్ ద్వారా వెబ్ సైట్లు చూస్తున్నపుడు వెబ్ బ్రౌజర్ లో కూడా యాడ్స్ కనిపిస్తుంటాయి. వాటి వలన మన డాటా వినియోగం పెరుగుతుంది. ఈ యాడ్స్ ని అరికట్టడానికి గేమ్స్ ఆడుతున్నపుడు నెట్ ఆన్ చెయ్యకపోవడం ద్వారా ఉచిత గేమ్స్ లో వచ్చే యాడ్స్ ని అరికట్టవచ్చును. కాని వెబ్ ఆధారిత అప్లికేషన్ లు వాడుతున్నపుడు వాటిలో యాడ్స్ ని తొలగించడానికి తప్పకుండా యాడ్ బ్లాక్ ప్లస్ ఉండాల్సిందే.

ఆంగ్రీ బర్డ్స్ ఆడుతున్నపుడు యాడ్స్

 యాడ్ బ్లాక్ ప్లస్ ని ప్లే స్టోర్ నుండి తొలగించారు. కనుక మనం దీనిని F-డ్రయిడ్ నుండి కాని .apk ని దింపుకొని ఇన్ స్టాల్ చేసుకోవాలి. యాడ్ బ్లాక్ ప్లస్ .apk ని ఇక్కడ నుండి దింపుకోవచ్చు. .apk ఫైళ్ళని ఇన్ స్టాల్ చేయడం గురించి ఇక్కడ చూడవచ్చు. రూట్ చెయ్యబడిన పరికరాలలో యాడ్ బ్లాక్ ప్లస్ మొబైల్ మరియు వైఫి నెట్ వాడుతున్నపుడు అప్లికేషన్లలో మరియు వెబ్ బ్రౌజింగ్ లో ఉండే యాడ్స్ ని పూర్తిగా తొలగిస్తుంది. ఇక రూట్ చెయ్యని పరికరాలలో మాత్రం వైఫి నెట్ వర్క్ ని ఇక్కడ చెప్పినట్లు కాన్ఫిగర్ చేసుకుంటే వైఫి నెట్ యాడ్స్ ని నిరోధించవచ్చు. రూట్ చెయ్యని పరికరాలలో మొబైల్ నెట్ కి యాడ్ బ్లాక్ ప్లస్ పనిచేయదు. కనుక వెబ్ బ్రౌజింగ్ వరకు ఫైర్ ఫాక్స్ ని వాడితే యాడ్ బ్లాక్ ప్లస్ యాడ్ ఆన్ ని ఇన్ స్టాల్ చేసుకోవడం ద్వారా యాడ్స్ ని నిరోధించవచ్చు.

మన పిల్లలకు అమ్మ భాష కమ్మదనాన్ని రుచి చూపిద్దాం

 ఐక్యరాజ్యసమితి నివేధిక ప్రకారం వేగంగా అంతరించి పోతున్న భాషలలో ఒకటయిన మన తెలుగుని బావితరాలకు అందించవలసిన బాధ్యత తెలుగు ప్రజలు అందరిది. పిల్లవాడు తన మాతృభాషలో విద్యాభ్యాసం చేయడం వలన బుద్ది తొందరగా వికసిస్తుందని నిపూణులు చెపుతూనే ఉంటారు. కానీ మనం ఈ పోటి ప్రపంచంలో తప్పని పరిస్థితులలో ఆంగ్ల మాధ్యమంలో చదివించక తప్పడంలేదు. పాతతరం పిల్లలు వారి ఆటలు, పాటలు అన్ని మన తెలుగు సంస్కృతిలో బాగమై ఉండి వారి మానసిక శారీరక ఎదుగుదలకు ఎంతో ఉపయోగపడేవి. ఆ ఆటలు, పాటలు ద్వారా పిల్లలు జ్ఞానాన్ని, ఆరోగ్యాన్ని వాటితో పాటు ఆనందాన్ని కూడా పొందేవారు. కాని ఈతరం పిల్లలకు దురదృష్టవశాత్తు ఆ అవకాశం లేదు. ఇంటి నుండి మొదలు బడి మొదలగు అన్ని చోట్ల పరబాషాధిపత్యమే.
 కిడ్స్ వన్ వారు అందించే వీడియోల వలన మనం పొందిన ఆనందాలను కనీసం మన పిల్లలకు పరిచయం చేయవచ్చు. తెలుగు పధ్యాలు, గీతాలు, ఆటలు వంటి మన తెలుగుధనం ఉట్టిపడే వీడియోలను అందిస్తున్న కిడ్స్ వన్ వారు నిజంగా అభినందనీయులు.






కిడ్స్ వన్ లో కొలువై ఉన్న తెలుగు గీతాలు

మీరు కట్టుకోబోతున్న ఇల్లు ఎలా ఉంటుందో ఇప్పుడే చూసుకోండి

 సొంత ఇల్లు అనేది ప్రతి ఒక్కరి కల. కట్టుకోబోతున్న ఇల్లు ఇలా ఉండాలి, అలా ఉండాలి అని ఎన్నో ఊహలు మనకి ఉంటాయి. ఇంటి నిర్మాణం పూర్తి అయితేగాని మన కలల ఇంటిని మనం చూసుకోలేము. మన ఊహలల్లో ఉన్న ఇంటిని మనం ఇప్పుడే చూసుకోవాలి అని, ఏ వస్తువు ఎక్కడ ఉంటే ఎలాగుంటుంది అన్న ఆసక్తి ఎవరికి ఉండదు? మన కలల ఇంటిని ఇప్పుడే మనం చూసుకోవచ్చు. పెద్ద సాంకేతిక పరిజ్ఞానం అవసరం లేకుండానే ఎవరైనా ఈ ఉచిత సాఫ్ట్వేర్ని ఉపయోగించి ఇప్పుడే కలల ఇంటిని చూసుకోవచ్చు. 
 స్యీట్ హోం 3D అన్న ఈ ఉచిత సాఫ్ట్వెర్ ని ఉపయోగించి మన ఇంటిలో ఉన్న గదులు వాటిలో ఏ వస్తువులు ఎక్కడ ఉండాలి, గోడల రంగులు, లైట్లు ఎన్ని ఎక్కడ ఉండాలి, పై కప్పు క్రింద ఫ్లోరింగ్ ఎలా ఉండాలి ఇలా చిన్న విషయం దగ్గర నుండి మనం డిజైన్ చేసుకోవచ్చు. డిజైన్ చేస్తున్నపుడే లైవ్ ప్రివ్యూ చూసుకోవచ్చు. మన ఇంటి నమూనాని డిజైన్ చేసుకున్న తరువాత పిడియఫ్ లేదా ఇమేజి లేదా వీడియోగా మార్చుకోవచ్చు. ఈ సాఫ్ట్వేరు మాక్, విండోస్ మరియు లినక్స్ ఆపరేటింగ్ సిస్టం లలో పనిచేస్తుంది.

ఉబుంటులో స్వీట్ హోం 3డి